HNLC dol, social media gita chadamberangko salna jotton ka·enga: DGP

SHILLONG: Chadamberangna dormaharangko bang·e on·na aro songsalna dangdikna chol on·na ku·rachakmike Hynniewtrep National Liberation Council (HNLC) bobil dolni manderang, a·dokni chadamberangko social media-rang gita salna jotton ka·enga ine a·dokni Director General of Police (DGP) Idashisha Nongrang parakataha.
Adita salrangna skang, HNLC bobil dolni area commander Samuel Wahlang Pahsyntiew-ni bame on·ani ja·man a·dokni DGP, ia kattarangko parakataha.
Bame on·gipa mandeko sing·sandion, HNLC bobil dolni dilgiparang, gital membor-rangko rimnapna skang, uamangni Election Photo Identity Card (EPIC)-rangko bi·atchengronga ine ma·sina man·aha.
Adita salrangna skang, Banjop aro Donbok minggipa mande sakgniko HNLC baksa jak dongani gimin rim·aha ine u·iatengon, HNLC bobil dolni bang·bata manderangkon internet gita agangrikesa rimnapronga ine DGP parakataha.
Sandirokanirangko dakon, HNLC bobil dolni dilgiparang, Khasi aro Jaintia Hills a·jani dingtang dingtang biaprango donggipa chadamberang baksa internet gita agangrikaha ine ma·sina man·aha indiba badita sak chadamberang, Bangladesh a·songchipak re·angna man·aha, ukosa name ma·sikujaenga ineba Nongrang parakataha.
Chadamberangko mikrake dongchina didiatengon, HNLC-o napanggipa bang·bata manderangan dikdiksa dongani ja·manon an·tangtangko name on·na re·bapiltokenga ine iandake social media-rang gita tol·e ku·mikchetani ba mikbokatanirangko bebera·jachina DGP mikrakataha.
Police department-ni man·na nangenggipa neng·nikanirangko janapatskaengon, Meghalaya Police-o kam ka·giparang chu·ongjaenga ine Nongrang parakataha. March jani gisepon sak 2800 gital sipairangko rimnapgnok ine janapatengon, ia gital police-rangko kamrango donatna skang, jasku ba ja 10-mangnade training-ko on·chengna nanggen ine DGP parakataha.
Niam gri koela bikotani bidingo janapatskaengon, ian da·o dipet kacharini jakosa ong·enga ine iani giminde ua talbate aganna jechakaiaha.
Indake ong·genchimoba, niam gri koela bikotenggipa biaprangko police-rang chadrapengkua aro Sukrobar salni gisepon niam gri bikotgimin metric ton 62 koelarangko rim·na man·aha ine DGP parakataha.