WILLIAMNAGAR: Meghalaya Democratic Alliance (MDA) sorkarini bilsichet gapaniko maniani bak gita Bristibar salo, FOCUS+ aro Green Meghalaya program-ni ning·o gimik gong kror 2.84-ni cheque-rangko a·dokni Chief Minister Conrad K Sangma-ni jakchi, ia scheme-ni namgniko man·enggipa East Garo Hills-ni manderangna sualataha aro ia cheque-rangko sualatanio, a·dokni PHE Marcuise N Marak, Meghalaya State Planning Board-ni Co-Chairman Nihim D Shira, East Garo Hills-ni Deputy Commissioner RP Marak, Superintendent of Police (SP) Stephen A Rynjah, sorkari official-rang, Nokmarang aro jolo songdongenggipa manderangba dongpae bak ra·angtokaha.
Ia program-ko Williamnagar-ni Police Parade Ground-o ong·ataha aro ia tom·anio a·dokni Chief Minister Conrad K Sangma, jinmana aganprakengon, a·doko songdongenggipa manderangni bakrimanichi Meghalaya sorkari, dingtang dingtang namroro silroroani scheme aro project-rangko ra·gate on·na cholko man·aha aro da·alo a·doko bang·en dingtanganiko nikna man·engaha ine parakataha.
A·dokna pilak nanga dakchakanirangko on·engani gimin ma·mong sorkari aro Prime Minister Narendra Modi-ko mittelpilangengon, a·dokni economy-o Meghalaya a·dokba Tamil Nadu a·dokni ja·man a·songo gnigipa ong·enga ine Chief Minister parakataha.
A·dokna namroro silroroaniko ra·baanio manderangni bakrimaniko nangchongmota ine janapatengon, a·doko pangkamgipa namroro silroroaniko ra·bana sorkari, dingtang dingtang cholrangkoba nienga ine Chief Minister aganaha.
Batanggimin bilsi bongani gisepo, FOCUS program-ni ning·o a·dok sorkari, gong crore 150-na baten tangka paisarangko koros ka·aha ine janapatengon, game ge·e cha·enggipa manderangna namgnirangko on·angkuna gita FOCUS+ program-ko bilsignina ra·dodapatgen ine Chief Minister parakataha.
Ia program-ko ong·atanio, a·dokni PHE Minister Marcuise N Marak-ba jinmana aganprakengon, ‘Our Magnificent Meghalaya – Vision 2032’-ni ning·o a·dok sorkari, 2032 bilsini gisepon Meghalaya a·dokni economy-ko dollar billion 16 ong·ate, India a·songo nambatsranggipa a·dokrangoni damsa ong·atna nisan ka·enga ine parakataha.
Dawagre gittimo bakan Horticulture-Agriculture College-ko rikna a·bachenggnok aro iana adita salrangna skangsan budget session-ni somoio tangka paisarangko chamataha ineba Minister parakataha.
