TURA: Bilsianti ong·atrongenggipa Annual District Industrial Exhibition-ko Bristibar salo, New Tura-ni Matchakolgre LP skul kal·chakramo a·bachengataha aro ia exhibition-o jakni kamko ka·enggiparang, bading chiwalgiparang aro self help group (SHG)-rangba bak ra·e, an·tangtangni tarigipa bosturangko mesokna cholko man·enga.
Ia District Industrial Exhibition-ko West Garo Hills a·jani Assistant Commissioner V Sharma, mongsonggipa sokgipa ong·e, do·ga oe on·angaha aro ia tom·anio ua, jinmana aganprakangengon, ia exhibition-ko ong·atanichi, joltango bading chiwale cha·enggipa manderangna aro jakni kamrangko ka·e cha·enggiparangna, an·tangtangni bosturangko mesokna aro palna sim·na cholko on·engani gimin District Commerce & Industries Centre (DCIC)-ko mittelpilangaha.
Bading chiwalgiparangna agan-ku·pattiani kattarangko aganangengon, “Na·simang kenna nangja maina na·simangni a·bachengatgipa kamrang namen nama aro iako na·simang dakangkuna nanga,” ine Sharma aganaha.
Ia program-ko ong·atanio, International Women’s Day-ko maniani bak gita bading chiwalanio chu·sokgipa me·chik sakbongana mande ra·pilskaanikoba dakangjolaha.
Ia program-ko Tura DCIC-ni Functional Manager BD Shira dilangaha aro rimchaksoani kattarangko Tura DCIC-ni Functional Manager CFR Marak aganangskaaha.
Program matchotani ja·man Tura DCIC-ni General Manager NFR Marak, kobor ra·timgipa manderangna talate on·angengon, ia District Industrial Exhibition-ko salgnina ong·atenga aro ia exhibition-o dol 60-mangni gita bading chiwalgiparang bak ra·enga ine parakataha.
Ia Exhibition-o jakchi dokgipa ba·ra kancharang, wata chengani bosturang, cha·ani ringanirang aro ma·manti bosturangko mesokenga ineba ua aganaha.
