AMPATI: South West Garo Hills a·jani Damalgre Lower Primary (LP) skulo Digital Library aro gital skul nokko Bristibar salo, Rangsakona constituency-ni MLA Subir Marak, nokdonggae on·angaha.
Ia program-ko a·bachengatanio, Rerapara C&RD Block-ni Block Development Officer (BDO) Cheman D Shira, rimchaksoani kattarangko aganangaha aro ja·mano Damalgre LP skulni chatro chatrirang, rimchaksoani gitko ring·aha.
Ia tom·anio, South West Garo Hills a·jani ADC aro DRDA-ni Project Director Raymond ZD Shira, jinmana aganprakengon, namgipa lekka porako on·ani, namgipa skul nokrangko nangani aro chatro chatrirangni dal·roroanio songsalni bakrimaniko nangani gimin agan-talatanirangko on·angaha.
Ia tom·anio, Rangsakona-ni MLA Subir Marak, mongsonggipa sokgipa ong·e, tom·anio bak ra·giparangna aganprakangskaengon, songadam nokadamrango lekka porani gadangko tang·doatna sorkari raken kamko ka·enga ine janapangenba, songadam nokadamrango poraienggipa bi·sarang, namgipa lekka porako ra·na man·na gita skul nokrangkoba rike on·enga ine parakangaha.
Bon·kamao, Ampati-ni District School Education Officer (DSEO), mittelpilani kattarangko aganangenba, ia program-ko matchotataha.
