Tura: Re·baenggipa GHADC election-o susanagipa candidate-rangna Scheduled Tribe ( ST) certificate-ko nangtelgipa dakatani bidingo unbaksana GHADC-ni gipin gipin mamlarango chagronggipa neng·nikarangko nirokatna ja·manchakengani bidingo Garo Hills-o namen so·sojengjeng ong·enga.
Civil society group aro pressure organisation-rang Garo Hills-o uamangni jingjengataniko bilakataha. Indake ong·engon Garo Students’ Union (GSU), sorkarini kosako jegalaniko dakna Non-Cooperation Movement-ko dakangaha.
Dingtang dingtang organisation-rang council-o chagrongenggipa dingtang dingtang neng·nikarang jekai- clear service and financial rule dongja, customary law-ko chelchakani, district council election-na dingtangmancha electoral roll-ko dabiani bidingo unbaksana GHADC-o administrative reforms-ko nangnikaniko janape, ia mamlako sorkari nirokatjaengani gimin suk ong·gijaniko parakaha.
GHADC-ni election sepangbaengon, council-o chagrongenggipa neng·nikarangko nirokatchina dabiani bilakbatenga. Garo Hills-o pressure group-rang council-ni bilrangko chelchakna dabienga.
Uni gisepon GHADC-ni Executive Committee, MDC election-o chakatna am·gipa candidate-rangna ST certificate nangtelaniko dakataha. Ia resolution-ko District Council Affairs Department-ni gita Governor-ni ra·chakanina watataha. Indiba iani bidingo Gazette notificatioin-ko man·sokujaenga.
Notification-ko man·kukajengani gimin Garo Hills-ni manderangni gisepo ding·chauanirang nakatenga uni gimin sorkariko ta·raken ia mamlako nirokatchina dabienga ine AHAM-ni president Georgeprince Ch. Momin aganaha.
