TURA: Re·baenggipa April jani 10 tariko ong·atna manchienggipa Garo Hills Autonomous District Council (GHADC) election-o susana gita National People’s Party (NPP)-ni candidate sakbongani bimingrangko Sukrobar salo parakdapataha.
NPP-ni gnigipa list-o Silkigire, Rongrikkimgre, Boldamgre, Raksamgre aro Naguapara constituency-rangna candidate-rangko parakataha.
Ia candidate-rangko NPP-ni state election committee ra·chakangaha aro ia sakbonga candidate-rangara, Silkigre GHADC constituency-na Jangseng R Marak, Rongrikkimgre-na Walbinath Ch Marak, Boldamgre-na Stevie M Marak, Raksamgre-na Sengko D Sangma aro Naguapara GHADC constituency-na Dhormonath Ch Sangma ong·a.
Adita salrangna skangsan GHADC election-o susana sienggipa sak 24 candidate-rangkoba NPP parakataha aro da·o candidate sakbongako parakdapatahani gimin GHADC-ni chu·gimik dam 29 constituency-rangna NPP-ni candidate-rangko parakmanaha.
GHADC-o gimik dam 30 constituency-rang donga aro ia dam 30 constituency-oni dam 29 constituency-nade election-ko ong·ate, seat damsanade Executive Committee-ko rikgipa party-rang, membor-ko songrongaia.
