TURA: Garo Hills-o donggipa tribal jatrangni a·arangko, bilko aro jatni dakbewal rikbewalrangko ripinge rakkina aro a·arangko gipin jatrangni ra·seke ra·enganiko chel·chakna, Garo Hills Autonomous district Council Tura, Constitution of India-ni Sixth Schedule-o pangchake aro District-ni ning·o dongimin niam retirang aro customary law-ko jarikenganio a·arangni nokgipa ong·anio pangchake, adita u·iatanirangko parakatangaha.
Skanggipao, Garo Hills-ni ning·o ong·gipa a·arangko tribal ong·gijagipa manderang, brena, ra·sekna, bondok ra·na, dongkamna ba a·arangni kosako bilko kangdrae ra·na man·jawa ine u·iatangaha. Gnigipao, je Garo Hills-ni ning·o ong·gipa a·arangko non-tribal rangna dake on·skana, segatna, ba a·a nokgipa ong·aniko see on·naniko ra·chakjawa aro iani bidingo daito-ko jako ra·e kam ka·enggiparang jako ra·na man·jawa ine u·iatangana agreba, Land Transfer-ni niam retirango pangchake songdongenggiparangna agrede, non-tribal rangni namgnina a·arangko jakkalchengna on·na man·jawa, uni gisepo, ia ra·gatgiminrangko manigija pe·ode, den·gale galna, gital daktaina aro niamrango panchake a·ani nokgipana pakwatpilna nanggen ineba Garo Hills Atonomous District Council-ni Deputy Chief Executive Member u·iatangaha.
