SHILLONG: Saksa a·gipi Congress dilgipa, Manuel Badwar-ni bimingan, Shillong Parliamentary bye-election-o susaatani gimin social mediao jangenga, jean party-ni gita susaatna inogipa jaksapgimin dilgipa ong·engachim.
Gitcham MP-ni bimingko janapgija, Vincent Pala indake aganaha je da·o dipet party iani bidingo mamingkoba chanchia dongkuja, candidate-ko seokna somoi nangkugen.
Candidate-ko seokanio party namen seng·a ine aganengon, Parliament-ona gital candidate-ko seoke watatna gita neng·anide ong·gen, maina election ong·na gita da·o bils gni adha-san dongaiaha aro gital seoke watatgipa candidate Delhiona re·angenba kam ka·ejolnade una neng·ani ong·gen, Pala aganaha.
Da·o chu·sokatna nangenggipa mongsonggipa minggni kamrang dongenga, uan mingsara ILP aro gnigipara Khasi aro Garo ku·sikko 8th Scheduled-o chapatna kam ka·anian ong·enga, aganjetjetjaode Ma·mongo sason ka·enggipa BJP sorkari namrenge dongaigen, Badwar aganaha.
“Chingo sak 100-na batpile MP-rang gnang aro ching baksa bakrimgipa gipin dolni MP-rangba dongengkua, gital seoke watatgipa MP, uamang baksa bakrimna nanggen aro Meghalayao maina ILP-ko nangenga aro Khasi aro Garo ku·sikrangko ma·ina constitution-ni eighth schedule-o chapatna nangengachim, talate on·na nanggen, ua aganaha.
Shillong-ni MP Dr. Ricky Andrew J. Syngkon-ni re·anggipa February 19 tariko rang·gitik siangani a·selo Shillong LS seat bangbang ong·rikaha.
