MDA-ni bilsi chet gapaniko ‘Vision 2032 Programme’-ko ong·ate mania

TURA:  MDA sorkarini bilsi chet gapaniko gisik ra·e maniao Tura, P.A Sangma Sports Complex-o “Our Magnificent Meghalaya | Vision 2032” program-ko ong·ataha. Sukrobar salo Meghalaya Democratic Alliance (MDA) sorkarini bilsi chet gapaniko West Garo Hills Tura Dakopgre, P A Sangma Sports Complex-o dal·bee manianga. Maniao Chief Minister Conrad K Sangma, Deputy Chief Minister Prestone Tynsong aro Snawbhalang Dhar, Assembly Speaker Thomas A Sangma, PHE Minister Marcuise N Marak, Tourism Minister Timothy D Shira, Education Minister Lakmen Rymbai, Deputy Commissioner Vibhor Aggarwal, una agreba MLA rang sorkari official-rang aro FOCUS+, Green Meghalaya+, CM-Elevate ni beneficiary-rang dingtang dingtang district aro songarangoni re·bae bak ra·angtokaha.
Chief Minister Conrad K Sangma jinmana aganprakataon, Meghalaya a·doko songdongenggipa manderangni bakrimanichi ku·monganichi a·doko da·alo namroro silroroaniko nikna man·engaha, da·alo bilsi chet gapaniko manianiara angni ong·ja angni cabinet-niba ong·ja aro sorkariniba ong·ja, indiba ia manianiara a·doko songdongenggipa sakantini manianian ong·a. Batanggimin bilsi chet somoirangni gisepo a·dokni infrastructure-rang namdapataha manderangni janggi tangani gadang tang·doaha ine aganaha. Shillong-o gital secretariat-ko rikenga baksana Tura-o Additional Secretariat-ko rikenga unbaksana rama, gital school-rangko rikani gimin parakaha.
Tom·aniko a·dokni anthem gitko ring·achi a·bachengaha.
Indake tom·anio Chief Minister, academic year 2025-26-na Chief Minister’s Scholarship Scheme-ko parakataha. Una agreba Uniform Grant -ko Direct Benefit Transfer-ni gita parakataha.
Uni gisepon a·dokni dingtang dingtang bakrango ge 101 community hall rikgiminrangko oprakate on·angjolaha. Jekon Project for Community-Based Forest Management and Livelihood Improvement in Meghalaya-ni bakni gita Japan International Cooperation Agency (JICA) aro Chief Minister’s Special Development Fund-ni dakchakaniko rikaha. Una agreba Garo Hills-o ge·chet warehouses aro Common Facility Centres (CFCs)-ko oprakate on·aha.
Indake MDA-ni bilsi chet gapanio a·dokni manderangko mittelpilskana gita crore 220 ni dingtang dingtang benifeciary scheme-rangko parakatenba “ FOCUS, FOCUS+  ni crore 40 na bate tangka paisarangko suale on·angaha. Chief Minister Scholarship-niko sak 98751 beneficiary student-rangna Crore 60 tangka paisarangko on·enga ine janape CM, jatni a·songni namgnina kam ka·na politics-o napahani gimin mikkchangchiba an·ching sakantian ku·monge kam ka·na ine ku·mongaha.
Uni gisepon Deputy Chief Minister Prestone Tynsong jinmana aganangaon, Chief Minister Conrad K Sangma-ni dilanio a·dok namroro-silroroenga ine janape sorkarini bilsi chet gapanina a·doko songdongenggipa manderangni bakrimani aro ku·monge kam ka·enganina mittelangaha.
Assembly-ni Speaker Thomas A Sangma, Tourism Minister Thimoty D Shira- uamangba CM-ko de·mittelangaha.