Candidate-na WGH-ni DC niamrangko donata
TURA: Garo Hills Autonomous District Council (GHADC) election-na notification ba u·iataniko on·ani ja·man da·al Sombar sal dipet, nomination file ka·aniko a·bachengatengahani gimin election-o susana sienggipa candidate-rangna, West Garo Hills a·jani Deputy Commissioner Vibhor Aggarwal, dingtangmancha niamrangko ra·gatangaha.
GHADC election-na nomination file ka·aniko March 9 tarikoni March 16 tarikona ong·atenga aro pu·onaniko April 10 tariko ong·atenba, result-rangko April 14 tariko parakna sienga.
“Assam & Meghalaya Autonomous Districts (Constitution of District Councils) Rules, 1951-ni Rule 124(2) ning·o dingtang dingtang constituency-rangna dilgiparangko seokna gita u·iataniko on·ahaon, nomination file ka·anikoba a·bachenggnok,” ine Deputy Commissioner-ni order-o parakataha.
“Nomination lekkarangko Deputy Commissioner (DC) office-on dingtang dingtang Returning Officer/Assistant Returning Officer-rangna on·anggen aro ra·chakenba nipilanggen. Political party ba an·tangtangari susaenggipa candidate pilakan nomination file ka·aniko tom·tome matchotatna nanga,” ineba DC-ni order-o janapaha.
Deputy Commissioner-ni u·iatani gitade, nomination file ka·ani somoio candidate sakprakni gari bolsakosan, DC office-oni metre 100-ni ning·o ra·napna man·aigen aro nomination file ka·anio candidate baksana proposer saksa, seconder saksa aro legal counsel ba ukil-san dongpana man·aigen.
Nomination file ka·ani somoio DC office complex-oni metre 100-ni ning·o mande sakbonga ba una bate tom·chimonganiko, Bharatiya Nyaya Sanhita (BNS)-ni section 189 ning·o champengataha ineba Deputy Commissioner u·iataha.
