GHICMF-ko songa
TURA: Re·baenggipa April jani 10 tariko ong·atenggipa Garo Hills Autonomous District Council (GHADC) election-o susaenggipa Independent candidate-rang, ku·cholsan ong·e susana miksonganio, dingtangmancha tom·aniko Tura-ni Burny Hills-o donggipa Tree House Resort-o ong·atangenba, Garo Hills Independent Candidate Movement Forum (GHICMF)-ko songe donangaha.
Ia Independent candidate-rangara, Silkigre constituency-ni Chusrang R Sangma, Jengjal constituency-ni Tengrang A Momin, Rongrikkimgre-ni Clinton R Marak, Raksamgre-ni Jepprin D Sangma, Wagesik-ni Noresh M Sangma, Raksamgre-ni Sengkan A Sangma aro Asananggre constituency-ni Chesrang Ch Marak ong·a.
Ia tom·anio Independent candidate-rang, mingsku miksonganirangkoba chanchiangaha aro ia miksonganirangara, Garo Customary Law (GCL)-ko pass ka·e ain gita chel·chakani, Tribal manderangna dingtang seokani bewalko ra·gatani, voter-rangni bimingrangko nipiltaie taridapani, District Council-ni tangka paisarangko koros ka·anio parak ong·ani dongna gita Finance Rule-ko tariani, Council-o kam ka·giparangna Service Rule-rangko tariani, tangka paisa koros ka·anirangko aro hisaprangko nirokna Public Accounts Committee-ko songani, dormaha aro council-ni dingtang dingtang korosrangko gamna digital payment system-ko ra·gatani, A·chikrangni niam reti aro bilrangko chel·chakna aro mangrakbatatna Transfer of Land & Revenue Act, 1976 (Mouza No. VI)-ko ra·galani aro District Council-ni simarangko name rakkina man·na gita simarangko sale ra·anian ong·enga.
“A·chikrangni niam retirang aro daka rikanirangko chel·chakanio GHADC-an mongsongbatsranggipa bimang ong·a indiba batanggimin bilsi 73-ni gisepo Executive Committee-ko chalaigiparangoni darangan GCL-ko chu·gimik pass ka·na man·chipkujaenga aro ian jatna namen dukni ong·a,” ine Independent candidate-rang parakataha.
GHADC election-o chegenchimode uamang, badiaba political party-rang baksa bakrimgenma ine sing·on, uamang darang political party-rang baksa bakrimjawa indiba manderangni chakpaanirangko man·genchimode Independent candidate-rang an·tangtangan GHADC-o EC-ko chalaina ku·cholsan kam ka·gen ine GHICMF-ni membor-rang parakataha.
