SHILLONG: North Eastern Hill University (NEHU)-o ong·enggipa obostarangni a·sel a·doko poraienggipa chatro chatrirangna nangchakeaniko ra·baenga ine Voice of the People’s Party (VPP), suk ong·gijaniko parakataha.
NEHU-o ong·enggipa obostarangna suk ong·gijaniko parakatengon, adita salrangna skang NEHU-ni Registrar-ko ma·sina man·gijagipa manderangni mikkang katipe chadrapaniara NEHU-na namgija bimingko ra·baani ong·aha ine VPP matnangataha.
VPP-ni parakatani gitade, NEHU-o poraienggipa chatro chatrirangoni bang·batan Meghalaya a·dokoni ong·a aro NEHU-ni ning·o iandakgipa a·sel ong·aniranga, a·dokni chatro chatrirangnan nangchakeaniko ra·baani ong·enga.
Vice Chancellor-ni kamtangko watjaengani a·sel NEHU-o poraienggipa aro kam ka·enggipa manderangni jingjengatanirangara University-ko chalaianio nangchakeaniko ra·baenga ine janapatskaengon, iandakgipa obostarangara, NEHU-o ong·enggipa golmalrangko namatani pal batesa namjabatatroroenga ine VPP parakataha.
NEHU-o tom·tomaniko ra·bapilna aro chatro chatrirangni lekka poranio nangchakeaniko ra·bajana gita ta·raken ia golmalrangko namatna nangenga ineba VPP parakataha.
NEHU-o ong·enggipa obostarangko namatna kam ka·engon, ia university aro university-o poraienggipa chatro chatrirangni namgnian mongsonggipa daito ong·na nanga ine VPP didiataha.
