SHILLONG: Sombar salo, Garo Hills Autonomous District Council (GHADC) election-na nomination file ka·na re·baani somoio jinma chadrapako man·ani ja·man Phulbari-ni gitcham MLA SG Esmatur Mominin, songtangona re·angpile manderangna aganprakengmiting somoio, ding·chaoatani kattarangko aganahani a·selsa Garo Hills-o so·sojengjeng ong·na a·bachengaha ine gitcham MLA-ni kosako Opposition dolni dilgipa Dr Mukul Sangma, FIR ka·doangaha.
FIR-ko Dr Sangma, March-ni 10 tariko, Phulbari Police Station-ni officer-in-charge (OC)-na ka·angaha aro uni FIR-o janapani gitade, Sombar pringo Phulbari-ni gitcham MLA, Tura-ni DC office-o jinmani chadrapako man·ani ja·man songtangona re·angpile, manderangna ding·chaoatani kattarangko aganengmitingko video-rango niksona man·aha.
Uni agananiko matchotatanio Mominin, sakgni dilgiparangko biming mingenba, uamangan uni nomination file ka·aniko ra·chakaha ine aganaha indiba uni iandake agananiara tol·gipasan ong·aia ineba Dr Sangma, FIR-o parakaha.
Garo Hills-o ong·enggipa obostarangni bidingo kobor ra·timgiparangna talataniko on·angengon, tom·tomaniko ra·bapilna aro manderangni gisepo ka·donganiko ra·bana gita rake kamko ka·na nangenga ine Opposition dolni dilgipa parakataha.
Garo Hills-o obostarang namjabatroroengahani gimin tom·tomaniko ra·bapilanian sakantini dakna nanggni kam ong·enga ineba ua aganaha.
GHADC election-ko ra·dona nanggenma ine sing·anina aganchakaniko on·angengon, skanggipa sorkarini dakna nanggnide manderangni ka·donganiko ra·bapilanian ong·enga aro manderang, election-ni kamrango ka·dongna man·na nanggen ine Dr Sangma aganaha.
