Chibinang Bazar-o dokkanrangko so·chipa
PHULBARI: Re·anggipa Sombar salo, Phulbari-ni gitcham MLA SG Esmatur Mominin-ko, uni Garo Hills Autonomous District Council (GHADC) election-o susana gita nomination file ka·na re·baako jegale jinma chadrapani ja·man, Phulbari police station-ni ning·o donggipa Chibinang jolrango rang·san ding·chaoe so·sojengjeng ong·aniko nikna man·aha aro ia so·sojengjeng ong·anio, mande sakgni so·otako man·aha aro bang·en saknaanirangko man·na nangaha.
Sombar salo, so·sojengjeng ong·anirang batroroangani gimin West Garo Hills a·ja gimikon walni 12:00 baji dipet District Magistrate, curfew-ko ra·gatangaha aro curfew-ko ra·gatangani ja·man so·sojengjeng ong·atgipa manderang aro police-rangni gisepo dinggrike, police-rang silchidarerangchi gona nangao ga·akaha. Police-rangni goanio, so·sojengjeng ong·atgipa manderangoni sakgnide sina nangaha aro gipinrangba mata bu·anirangko man·aha ine kobor on·timgiparang parakataha.
Saknaa man·gipa manderangni gimin janapatengon, ia a·sel ong·anio komibeoba sak 10 ba sak 12-mangni gita manderang, saknaanirangko man·aha ine official-rang parakataha.
Sombar walo so·sojengjeng ong·ani ja·man Chibinang jolrango bang·a nokdangrangan noko nape dongtokaiaha aro ia biaprango chel·chakgipa sipai dolrangko bang·en donataha.
Official-rangni u·iatani gitade, da·o dipet West Garo Hills a·jani Superintendent of Police (SP) Abraham T Sangma an·tangan ua biapo donge, tom·tomaniko ra·bapilna kamrangko ka·dilenga.
Sombar walo, so·sojengjeng ong·anio, Chibinang-o donggipa GSU office-ko so·chipe galaha aro unbaksana sambao donggipa dokkan ge·gnikoba manderang so·e galaha ine kobor on·timgiparang u·iataha.
GSU office-ko so·ani ja·man, Chibinang bibra sambao donggipa dokkanrangko so·chipaha aro ia dokkanrangko so·anio, komibeoba dam 30 dokkanrang kamchipako man·aha. Dokkanrangko wa·al so·anio, cylinder gopretani a·selba dokkanrang bang·en nosto ka·ako man·angaha.
Kobor on·timgiparangni u·iatani gitade, so·sojengjeng ong·engmiting somoio, manderangni nok te·gittamkoba so·aha indiba ia nokrangko so·anio darangba saknaanirangkode man·jaha.
Sombar walo, so·sojengjeng ong·atgipa manderang aro police-rangni gisepo gogrikani walgimikan ong·aha aro pringchipaksa dontongaha ine kobor on·timgiparang u·iataha.
Sombar walo, so·sojengjeng ong·ani bidingo kobor aro video-rangko watrorona a·bachengahani gimin obostarang namjabatangna kene District Administration, Sombar waljatchi 12:00 bajionin konta 48-na mobile internet-ko dontongataha aro West Garo Hills a·ja gimikon konta 24-na curfew-koba ra·gatangaha.
