Namataniko ra·bana Political party gimikko chanchidilna paraka
SHILLONG: Garo Hills-o so·sojengjeng ong·anirang dontongjaengon, a·doko songdonggipa manderangko tom·tomaniona re·bachina aro so·sojengjeng ong·ataniko dakjachina gita Meghalaya Chief Minister Conrad K. Sangma mol·moltaha aroba nangnikenggipa kamrangni bidingo pilak political party-rangko aroba agan-kupattinasigipa dilgiparangko okamchimongenba iani bidingo chanchirimaniko A·dok sorkari ru·utgijan dakatgen ineba Chief Minister Conrad K. Sangma Butbaro ku·rachakaha.
Da·o ong·enggipa obostarangni bidingo tom·anio chanchirimgen aroba ia chanchianioba agan-kupattie on·asigipa pilakkon okamgen, jedakode iana chu·sokataniko ra·bana man·gen, CM aganaha.
“Indake ia neng·nikbeani somoio, Meghalayao songdonggipa pilak manderangko, dingtangmancha Garo Hills-o songdonggiparangko, tom·tomaniko aro niam aro ainko ja·rikpachina anga mol·molatna ska” ineba Chief Minister, uni social media post-o janapataha.
Da·o ong·enggipa obostarangko niatenba A·dok Sorkari, Garo Hills Autonomous District Council (GHADC) election-ko dontangataha ineba ua parakataha.
Unbaksana tom·tomanina bi·china aroba tom·tomaniko ra·bana dakchakchina gitaba ua songdonggiparangko didiataha.
