SHILLONG: Chief Minister Conrad Sangma, Butbar salo jinma manderang uni nokko wa·al so·chipe galna aro uni nokdangni manderangko chadrapna mongsonge jinma manderang re·angani koborko man·soachim indiomangba ua noktangko wate katna jechakaha aganaha.
Jinma manderangni re·baani koborko man·soe security officer-rang, chelchak-naljokanina gipin biapona jitatna agan-ku·pattiahachim indiba anga nokko wate katna jechakaha. ‘Angni janggi Nokgipani jakosa ong·a, anga kenja ine agane CM, ong·kate katjaha.
Sangma, an·tangko saksa A·chik (Garo) ine janape, anga P.A Sangma sagini an·chisa, ang pagipa sagioniko ka·donganiko man·rika ine CM aganaha.
Ua agana; ua uni jatna namen ka·saa aro manderangni namgnina aro ku·cholsan ong·anina dingchiken kam ka·angkugen.
Kajia-golmal ong·anina aro gam-jinrangko nosto ka·anina suk ong·gijaniko parakan baksa tom·aniko rakkichina gitaba ua mol·molaha.
Jedakgipa kamkoba democratic-ni bewalo agangrik kam ka·sosa chu·sokna man·a ine aganengon, jatni a·dokni namgnina agangrike kamrangko ka·na ineba ua a·dokni manderangko ku·mongaha aroba kajia-golmal ka·aona sokatangjachina gitba CM mol·molataha.
