SHILLONG: Phulbari-ni gitcham MLA SG Esmatur Mominin-ni, Garo Hills Autonomous District Council (GHADC) election-o susana gita nomination file ka·drana am·ani a·selsa Garo Hillso so·sojengjeng ong·aona sokaha ine Federation of Khasi Jaintia Garo People (FKJGP) matnange aganaha.
Mominin-ni daka kamara re·anggipa February 17 tariko GHADC-o niam ra·gatgiminko drae daka ga·aka, jeon Council election-o susana gita Scheduled Tribe certificate-rangko nangtelgen ine ra·chake donmanahachim ine FKJGP president Dundee Cliff Khongsit aganaha.
“Esmatur Mominin, nomination file ka·na re·angjaode indakgipa a·sel obostarang Garo Hills-o ong·jawachim. Garo Hills-o so·sojengjeng ong·aniko ra·bagipade uan (Mominin). Ua A·chikrangni nangnikaniko dal·e ra·ja, aro onchepe ra·aha. So·sojengjeng ong·aniko ra·bagipade Mominin-an, unigimin uko rim·na nanga aro uniko kosako niamo pangchake bichal ka·na nanga” ineba Khongsit aganaha.
Ia neng·nikani somoio chinga A·chik manderangna chakpaaniko on·a ineba FKJGP, koborni manderangna parakaha.
‘‘Chinga mamingsaloba, District Council-o a·jatangni mande ong·gijako susana chol on·jawa ineba” Khongsit aganaha.
Chibinango donggipa Garo Students’ Union (GSU) office-ko so·anikoba FKJGP jegalataha.
Iarang baksana, re·anggipa somoio, ISIS-ni poster-ko tapenba ka·mikkenatani kattarangko see donanganiba jajrengani aro simsakna nanganikoba Federation aganaha.
Khongsit agandapkua je, “Garo Hills-o Bangladeshi Muslim-rang jelroroengaha” unigimin a·dokni manderang, pilakni namgnina ku·cholsan ong·e iako warachaksona nanga.
