TURA: Garo Hills Autonomous District Council (GHADC) election-ni bidingo re·anggipa Sombar salonin Garo Hills-o so·sojengjeng ong·anirangko nikna man·engani gimin West Garo Hills a·jao, March-ni 11 aro March-ni 12 tariko ong·atna tik ka·gimin Higher Secondary School Leaving Certificate (HSSLC) porikkako Meghalaya Board of School Education (MBOSE) dontongatchengaha.
Iani bidingo u·iataniko on·atengon, March-ni 11 tariko ong·atna tik ka·gipa Music aro March-ni 12 tariko ong·atna tik ka·gipa Anthropology subject-ni porikkarangko West Garo Hills a·jao dontongatchengna nangenga ine MBOSE-ni official-rang parakataha.
Ia salgnini gisepo ong·atna tik ka·gimin porikkarangko ja·mano ong·atangskagen aro tarikrangko ja·mano u·iatgen ineba MBOSE-ni official-rang parakataha.
Ia salgnini gisepo ong·atenggipa porikkarangko Meghalaya a·dokni gipin a·jarangode a·bachengo tik ka·sogimin gitan apsan tarikrangon ong·atangaigen.
Garo Hills-o, mongsongbate West Garo Hills a·jao so·sojengjeng ong·anirang batroroengani gimin ia salgnini gisepo ong·atenggipa porikkako dontongatchengna nangaha ineba MBOSE-ni official-rang u·iataha.
Indake ong·genchimoba, ia u·iataniko ja·manchake on·ahani gimin mitam skigiparang, MBOSE-ni kamna suk ong·gijaniko parakatskaaha.
Skigiparangni parakatani gitade, ia u·iataniko March 10 tariko ine tarikko seahaoba, March 11 tarik pring 8:00 bajiosa manderangna watatahachim.
