TURA: Garo Hills Autonomous District Council (GHADC) election-ni bidingo jegalanirangko dake, jatgnini gisepo ding·chaogrikaniko ra·baahani gimin aro Garo Hills-ni dingtang dingtang biaprango so·sojengjeng ong·atahani gimin West Garo Hills a·jani a·kawe jolo donggipa mande sakgittam, chong·motan Enamul Hoque, Esmatur Mominin aro Sofior Rahman-ni kosako A·chik State People’s Front (ASPF), FIR ka·doangaha.
FIR-ko Budbar salo, ASPF-ni chief organizing secretary Raksim Marak, East Garo Hills a·jani Songsak Police Station-o ka·angaha.
“Ia manderang, social media-rango aro jinma tom·anirango, badiaba jatrangko miksonge, ding·chaoatani kattarangko aganaha aro iani a·selan jatgnini gisepo ding·chaogrikanirangko ra·bae, so·sojengjeng ong·ataha,” ine ASPF, FIR-o janapataha.
Ia manderangni kamrangara, BNSS-ni dingtang dingtang section-rango on·gimin niamrangko aro election-na dongimin Model Code of Conduct (MCC)-ni niamrangko pe·ani gita ong·ahani gimin sastirangko man·na kraa ineba ASPF-ni FIR janapataha.
Ia manderangni kamrangara, so·sojengjeng ong·aniko aro dingtang dingtang jatrangni gisepo ding·chaogrikaniko ra·baani gita ong·aha ine janapatengon, ia manderangni kamrangko name sandirokchina aro mikkangchi jatrangni gisepo dinggrikanirangko chel·chakna gita ia manderangni kosako rakgipa ja·kurangko de·china gita ASPF didiataha.
