TURA: Re·anggipa Budbar attamo, Tura songjinmao so·sojengjeng ong·atenggipa manderang baksa police-rangni nanggrikanio, adita sak manderang sia ine jangbingbanganiara kakket ong·ja maina ia a·sel ong·anio police aro Army-rangni goanichi, adita sak manderang saknaanirangkosa man·aiaha ine official-rang parakataha.
Garo Hills Autonomous District Council (GHADC) election-o Tribal ong·gijagipa manderangni bak ra·aniko jegale jingjengatani re·anggipa Sombar salonin a·bachengahachim indiba obostarang Budbar salo bilongbatangaha. Budbar pringonin Army-rang, flag march-ko ka·e, Tura songjinma gimik re·rurae nirok sandianirangko dakangaha indiba Budbar attamchibara, jingjengatgipa manderang ka·sinsin bang·baroroe Hawakhana-o so·sojengjeng ong·anirang bilongbana a·bachengaha.
Hawakhana-o jingjengatenggipa manderang, NPP office baksana adita dokkanrangko so·aha aro unoni Araimile-chipak re·angon, ramarango adita dokkanrangkoba nisie galangaha.
Araimile-ona sokon, jingjengatenggipa manderangko police aro army-rang champengsoenba, noktangtangchi re·angpilchina aganahachim indiba manderang manigija re·draangna jotton ka·ahani gimin ja·mano police-rang, bangbango gochengna nangaha. Iani ja·manba, manderang ua biaponi katgija police-rangko chadrappangpilna jotton ka·on police-rang, silchidarerangchi manderangko gona a·bachengaha aro police-rangni iandake goanio, komibeoba sakbri manderangde guli nanga man·e, saknaanirangko man·na nangaha ine official-rang u·iataha.
Ia a·sel ong·ani ja·man mande sakbri sina nangaha ine social media-rango jangbingbangna a·bachengaha indiba ja·mano iako sorkari official-rang jegalatenba, ia a·selo darangba sia dongkuja ine talataniko on·atskaaha.
Iana skang apsan salon, East Garo Hills a·jani Williamnagar-oba manderang jinma tom·chimonge, main bazar-o donggipa dokkanrangko pe·rurue nosto ka·angaha ine koborko on·aha.
