TURA: Batanggimin sal somoirango West Garo Hills a·jao, mongsongbate Chibinang jol aro Tura-o manderangni ding·chaoe so·sojengjeng ong·anirangko nikna man·ahani gimin tom·tomaniko man·srangkujaskal, West Garo Hills a·jani District Magistrate, Bharat Nagarik Suraksha Sanhita (BNSS)-ni Section 163-ni ning·o, March-ni 13 tarik pringwal 12:00 bajioni March 14 tarik pringni 6:00 bajiona curfew-ko konta 30-na ra·dodapataha.
Indake ong·genchimoba, manderang an·tangtangna nanga bosturangko koros ka·na man·na gita curfew-ko March-ni 13 tarik Sukrobar salo, pring 9:00 bajioni attam 1:00 bajiona dontongatchengenga ine District Magistrate u·iataha.
Curfew-ni somoirango, skul-college-rang, bank-rang, dokkanrang, bazar-antirang aro office-rangko chipe donna nanggen indiba hospital-rang, pharmacy-rang aro nangchongmotana re·ruragipa aro kam ka·giparangkode champengani dongjawa ineba District Magistrate u·iataha.
