A·dok sorkarirang simsakjani a·selsa a·doko gipin jatrang jelaha ine KSU, HYC matnanga

SHILLONG: Chengonin a·dok sorkarirang champengsojani a·selsa da·alo gipin jatrang, mongsongbate Tribal ong·gijagipa manderang, Meghalaya a·doko jelaha ine Bristibar salo, Khasi Students Union (KSU) matnangatenba, Garo Hills-o ong·anggipa a·selan Meghalaya sorkarina mikrakatani ong·gen ine parakataha.
KSU-ni president Lambokstarwell Marngar-ni parakatani gitade, gitcham aro da·o ong·enggipa sorkariba, gipin biaprangoni napsrukbaenggipa gipin jatrangko champengsona gisik nangjani a·selsa da·alo Tribal ong·gijagipa manderang, a·doko jelbra jelsuaha.
Iandake gipin biaprangoni napsrukbaenggipa manderangko champengsoe, Meghalaya a·dokni Tribal-rangko chel·chakna gitasa a·dokni dingtang dingtang dolrang, Inner Line Permit (ILP) gita dakgipa niamko ra·gatchina a·dok sorkario dabiengachim ineba Marngar parakataha.
Bilo ong·enggipa manderangni simsakjani a·selsa Tribal ong·gijagipa manderang a·doko jelbra jelsue, a·doko songdongenggipa Tribal manderangni bilrangko ra·sekna jotton ka·engaha ine KSU president aganaha.
“Ia manderang (No-Tribal), Tribal-rangni bilrangko ra·sekna jotton ka·asan ong·jaenga indiba bilrangkoba mesokna pa·engaha,” ine ua aganaha.
District council-rangko mangrakbatatchina gita a·dokni dingtang dingtang dolrang sorkario dabiengachim indiba bilo ong·enggipa manderang, bang·bata changon nikja dake dongrongaia ineba Marngar aganaha.
“Bilo ong·enggipa manderangko chinga jaksi otna nangaia maina uamang chingni dabianirangko knachakjani a·selsa da·alo iandakgipa obostarangona sokengaha,” ine KSU president aganaha.
Garo Hills-ni dingtang dingtang dolrang baksa KSU bakrimaniko on·paenga ineba ua parakataha.
Indake ong·engon, batanggimin somoirango a·dokko dilgiparang, gipin jatrangko jelbra jelsuna on·ahani a·selsa da·alo Tribal Garo manderang, iandakgipa neng·nikanirangko chagrongna nangenga ine Hynniewtrep Youth Council (HYC)-ni president Roy Kupar Synrem-ba parakataha.
Garo Hills-ni a·kawe jolrango, Tribal ong·gijagipa manderangan Garorangna bate bang·bataha ineba Synrem aganaha.
“Kenna nangani chinrangko an·ching pilakan niksomanaha indiba da·alo ong·enggipa obostara indita bilsirangna dongchipenggipa kenna nangani bretanisa ong·aha,” ine ua aganaha.
KHADC election-o maikai Tribal ong·gijagipa manderang susana man·gen ine sing·doatengon, “Garorangni daka rikani aro niam retirangko rakkina on·gimin GHADC-o Tribal ong·gijagipa manderangba bak ra·pana man·enga ong·ode district council-ko on·anio mai namgni dongkuenga,” ine Synrem matnangataha.
Niam gri songdong a·chaenggipa manderangko warachakanio Garorang baksa HYC aro Confederation of Meghalaya Social Organisation (CoMSO)-ba bakrimpaenga ineba ua parakataha.