GH-o ong·enggipa obostako namatna Special Session-ko ong·atchina FKJGP dabia

SHILLONG: Garo Hills-o so·sojengjeng ong·aniko namatna gita Meghalaya Legislative Assembly-ni special session-ko ta·raken ong·atchina Federation of Khasi Jaintia & Garo People (FKJGP), a·dok sorkariko didiataha.
Iani bidingo janapatengon, Garo Hills-o tom·tomaniko ra·bapilna aro Sixth Schedule-ni ning·o Tribal jatrangna on·gimin bilrangko chel·chakna gita ta·raken ja·kurangko de·china FKJGP-ni dilgipa Khrawkupar Nongsiej, a·dok sorkariko didiataha.
Garo Hills Autonomous District Council (GHADC) election-rango Tribal ong·gijagipa manderangko susapana ba dilgiparangko seokanio bak ra·pana on·engani a·selsa manderang ding·chaoe so·sojengjeng ong·angaha ineba Nongsiej parakataha.
GHADC election-o Tribal ong·gijagipa manderangni bak ra·paaniko champengna gita re·anggipa February jaon GHADC-ni Executive Committee (EC), niamko ra·gatahaoba a·dok sorkari, ta·rake ja·kurangko de·jahani a·selsa indakgipa obostaona sokaha ineba FKJGP matnangataha.
GHADC-ni niamko ra·gatangani ja·man ta·raken sorkari ja·ku de·genchim ong·ode, Garo Hills-o so·sojengjeng ong·aniko champengna man·naba gnangchim ineba Nongsiej parakataha.
District Council-ni niamrangko taridapchina dabie jingjengatanichi dingtang dingtang dolrang, Garo Hills-o namroro silroroani kamrangko champengenga ine adita salrangna skang, a·dokni Deputy Chief Minister Prestone Tynsong-ni agananikoba ua raken jegalataha.
Tribal jatrangna on·gimin bil aro niam retirangko chel·chakani pal a·dok sorkari, gipin biapni manderangna namgni ong·nagipa namroro silroroanikosa dal·bate ra·skaenga ineba FKJGP-ni dilgipa matnangataha.
GHADC election-ni bidingo jingjengataniko Inner Line Permit (ILP)-na dabiani baksa nangatna nangja ine Tynsong-ni agananikoba FKJGP raken jegalataha.
Meghalaya a·doko ILP gita dakgipa niamrang dongjani a·selan gipin biaprangoni manderang napsrukbae a·doko niam gri songdong a·chana man·enga ine janapatengon, iani giminsa a·dokni Tribal manderang, an·tangtangni janggi tanganina kenchake ja·kurangko de·enga ine Nongsiej parakataha.
Dilgiparangni iandakgipa kattarangko agananichi, so·sojengjeng ong·aniko namjabatatna man·gen ineba ua mikrakataniko on·angaha.
Garo Hills-ni manderangko ku·cholsan ong·angkuchina aro uamangni dabianirangko sorkari chu·sokatkujaskal an·tangtangna on·gimin bilrango pangchake dakgrikangkuchina gitaba FKJGP didiataha.