WILLIAMNAGAR: Williamnagar Masjid-oniko camouflage gandingrang aro adita gulirangko man·a ine jangbingbanganirang ong·katani ja·man, ia gandingrang aro gulirangara, chutti ra·e dongenggipa polics saksanisa ong·achim ine East Garo Hills a·jani Superintendent of Police (SP) talataniko on·ataha.
SP-ni parakatani gitade, Williamnagar Masjid-oniko camouflage gandingrang aro adita rong gulirangko man·aha ine Sukrobar pringo, dolsa manderang, police-rangna u·iataha indiba iani bidingo police-rang am·sandianirangko dakon, ia gandingrang aro gulirangara, chutti ra·e dongenggipa police saksanisa ong·achim ine ma·sina man·aha.
“Koborko man·soani ja·man police-rang am·sandianirangko dakon ia police, Williamnagar Masjid sambao nok para ra·e dongengachim ine ma·sina man·aha. Ia police da·o chutti ra·e dongengmiting ong·e, an·tangni dingtang dingtang bosturang, jekai police-ni gandingrang, juttarang, camouflage, guli chipe ra·bitgipa jolongga aro gulirangko ua biapo donangaha. Police-rang chutti ra·engmiting somoirango silchidare aro gulirangko Armoury Kote-osa donna gita nangachim indiba ua an·tangna on·gipa bosturangko niam gri, an·tangni dongchakgipa biapo donahani gimin da·o police-rang, uni gulirangko rim·aha aro ia police-ni kosako rakgipa ja·kurangko de·na Arms Act-ni ning·o mokordomako ka·aha,” ine SP parakataha.
Social media-rango tol·gipa koborrangko giproroatjachina gita manderangko didiatengon, ia ge·etaniko manijagenchimode niamo pangchake rakgipa ja·kurangko de·gen ine East Garo Hills a·jani SP mikrakataniko on·angaha.
