SHILLONG: Ia bilsio, Education Department-ni tangka chamani da·sikkari gita ong·gija komibatgenchimoba Department-ko chalaianio neng·nikanide dongjawa ine Education Minister, Lahkmen Rymbui aganaha.
Indakeba nikatna man·a je, Education Department-na tangka chamani da·sikkariode Gong kror 3654 ong·achimachim, ia bilsini budget-ode department-na tangka chamaniko kror 3347-ona komiataha.
Department-na tangka chamani ia changode on·tisa komiaha ine ra·chakengon, department-na tangka chamanio komigenchimoba poraienggipa chatro-chatrirangni namgnina kam ka·anio maming nangchakeani dongjawa ine Education Minister aganaha.
Department-na tangka paisa chamanio komigenoba institution-rangna nokrik-nokdakanirangko dakanio aro skigiparangna dormaharangko on·anioba maming nangchakeani dongjawa ineba ua agandapaha.
Unomitingo indakeba nikatna man·engkua je, April 1 tarikode mitampak dolni skigiparangni dormarangkoba bariatna gita sorkari ku·rachakmanaha ine ma·sina man·a.
