SHILLONG: Garo Hills Autonomous District Council (GHADC) election-o Tribal ong·gijagipa manderangni bak ra·paaniko jegale batanggimin sal somoirangonin so·sojengjeng ong·angahani gimin West Garo Hills a·jao mobile internet-ko champengatengani a·sel manderang, kamrangko ka·anio neng·nikanirangko chagrongna nangtokengahani gimin mobile internet-ko watpilchina gita Tura-ni MDC aro BJP-ni state vice president Bernard N Marak, a·dok sorkariko didiataha.
Marak-ni parakatani gitade, da·ororo Garo Hills-ona ka·sinsin tom·tomani sokbapilengahani gimin manderangna mobile internet-ko watpiltaina nangengaha.
Mobile internet dongjae aro bijoli sirongengani a·sel West Garo Hills a·jao songdongenggipa manderang neng·nikanirangko chagrongna nangtokenga ine janapatengon, UPI service aro ATM-rang kam ka·jaengani a·sel manderang tangka paisarangko okna man·jae, korosrangko ka·anioba neng·nikanirangko chagrongna nangtokenga ine Marak parakataha.
Mobile internet-ko watkujaengani a·sel chatro chatrirangba, an·tangtangni kamrangko matchotatna man·jaenga aro internet-o pangchakna nanggipa job card holder-rangba neng·nikanirangko chagrongna nangtokenga ineba Tura MDC parakataha.
A·bri jolrango da·o tom·tomaniko man·piltaina a·bachengaha ine janapatskaengon, internet-rang dongjani a·selan a·kawe jolrango ong·enggipa obostarangni gimin koborrangko ra·na man·jaenga ine Marak parakataha.
