Neng·nikaniko man·enggipa manderangna dakchakaniko on·na CM ku·rachaka
TURA: Robibar pringwalchipak, Garo Hills-ni adita biaprango stilrang jimbee ga·akangani a·sel bang·a biaprangon manderangni nok-jam, gari gora aro bagan barirang nosto ka·ako man·e, manderang noksan ong·na nangtokaha.
Tura-oba Sonibar walonin mikka kimpreta baksana balwarang aditan ta·rakangaha aro Robibar pringwalchibara, rang·san stilrang dal·dalbee ga·akanonange, manderangni nok-jam, gari gora aro bagan barirangko nosto ka·angaha.
Stilrang dal·dalbee ga·akonani a·sel bang·bata biaprangon manderangni nokkingrang, gari gorarang aro bagan barirang bilongbee nosto ong·atako man·angaha.
Badiaba badiaba biaprangode mikka balwa ta·rakanganichi bolrangni be·anirangkoba nikna man·aha.
Koborko on·ani gitade, Robibar pringwalchipak, mikka balwa aro stilrang ga·akonangani a·sel Shillong, Nongstoin, Tura aro Baghmara jolrango bang·en nangchakeaniko man·angaha.
Indake ong·engon, a·dokni bang·bata biaprangon mikka balwa ta·rakani a·sel aro stilrang jimbee ga·akonangani a·sel bang·a nokdangrangan neng·nikanirangko man·na nangtokahani gimin Robibar pringo a·dokni Chief Minister Conrad K Sangma, dal·dalgipa sorkari official-rang aro nangchakea man·gipa a·jarangni deputy commissioner-rang baksa tom·aniko ong·atangenba, neng·nikanirangko man·enggipa manderangna dakchakaniko on·china ge·etangaha.
Stilrang dal·dale ga·akanichi bang·a nokdangrangan, nok-jam, gari gora aro bagan barirang nosto ka·ako man·na nangahani gimin neng·nikaniko man·enggipa manderangna pilak nanga dakchakanirangko on·china gitaba Chief Minister, dingtang dingtang a·jani deputy commissioner-rangna ge·etaniko on·angaha.
Mikka balwa ta·rakanganichi aro stilrang jimbee ga·akanganichi badiaba badiaba biaprango bijoli aro chi jokenggipa pipe-rangba nosto ka·ako man·ahani gimin bijoliko ta·raken watpilna gita aro chirangko jokate on·pilna gita kamrangko ka·chinaba Chief Minister, sorkari official-rangna ge·etaniko on·angaha.
