GHADC-ni niamrangko rakbatatna jak on·china a·dokni Guv-ko mol·mola

TURA: Garo Hills Autonomous District Council (GHADC) election-rango Tribal ong·gijagipa manderang bak ra·na man·jana gita aro electoral roll-rango Tribal-rangna agre gipin jatrang biming dongjana gita niamrangko rakbatatna jak on·china Garo Hills-ni social activist ba songsalna dangdike on·enggipa adita sak manderang, a·dokni Governor-ko didiataha.
Iani bidingo Garo Hills-ni saksni manderang, chong·motan Greneth M Sangma, Shiva Sangma, Flaming Marak, Emanuel Ch Marak, Cherian Momin, Browny M Marak aro Nilbert Ch Marak, a·dokni Governor-na sedoatengon, GHADC election-rango Tribal ong·gijagipa manderangni bak ra·paani, electoral roll-rango Tribal ong·gijagipa manderangni bimingrangko segatani aro Tribal-rangni a·arangko patta dake ra·aniara Sixth Schedule-ni ning·o on·gimin bil aro niam retirangko pe·ani ong·enga ine parakataha.
Iandakgipa niamrangni bidingo ge·etaniko on·na aro niamrangko rakkina a·dokni Governor-o bilrang donga ine janapatengon, Indian Constitution-ni Article 244(2) aro Sixth Schedule-ni ning·o Garo Hills-ni Tribal-rangko chel·chakna dongimin niamrangko rakkichina ia manderang, a·dokni Governor-ko didiataha.
1997 bilsini Samatha vs Andhra Pradesh aro 2013 bilsini Orissa Mining Corporation-ni Tribal-rangna on·gimin bil, a·a-chia aro jatko chalaiani bilrangko chel·chakani giminba social activist-rang janapataha.
GHADC election-o A·chikrangsan susana man·na gita niamko ra·gatchina, election-o susaenggipa candidate-rang Meghalaya a·doko songdongkamgipa ba a·doko atchikamgipa ong·na nangchina, electoral roll-rangko Special Intensive Revision dakna ge·etchina, Tribal ong·gijagipa manderangni bimingrangko electoral roll-rangoniko kimitchina, Tribal ong·gijagipa manderangna a·a patta on·aniko champengchina aro a·kawe jolrango Tribal ong·gijagipa manderangna Tribal-rangni a·arangko palna man·jana gita niamko rake ja·rikchina gitaba social activist-rang, Governor-na seatgipa chittio janapataha.
“Sixth Schedule-ara, Tribal jatrangko, a·a chiarangko aro jatko chalaianio chel·chakna on·gimin dingtangmanchagipa niam bidiksa ong·a,” ine Governor-na seatgipa chittio Garo Hills-ni social activist-rang parakataha.