Internet-ko ta·raken watpilchina dabia
TURA: Garo Hills-ni dambonga a·jarangon mobile internet-ko champengatengani a·sel manderang neng·nikanirangko chagrongna nangtokengani gimin Mongolbar salo a·dokni Congress dol, Conrad Sangma-chi dilenggipa a·dok sorkariko matnangatenba, internet-ko ta·raken watpilchina dabiangaha.
Garo Hills-o internet-ko champengatengani a·sel manderang kamrangko ka·anio neng·nikanirangko chagrongna nangtokenga ine internet-ko ta·raken watpilchina Meghalaya Pradesh Congress Committee (MPCC)-ni working president Deborah C Marak, a·dok sorkariko didiataha.
Garo Hills-o internet-ko chipe donani da·o antisa batpilengahani a·sel pilak manderangan neng·nikanirangko chagronga nangtokengaha ine janapatengon, ia chasongde digital-ni chasongsa ong·ahani gimin internet-ko jakkalanide mandeni janggi tanganio nangtelgipa gitan ong·engaha ine Marak parakataha.
Internet-ko antisa batpile champengatengani a·sel bading chiwalgiparang aro hajira ka·e cha·enggipa manderangba nangchakeaniko man·na nangenga ine janapatengon, ia sal somoirango manderang, internet-chisa tangka paisarangko gamna jakkalengani gimin ian manderangna neng·nikaniko ra·baani ong·enga ine MPCC-ni working president parakataha.
Marak-ni parakatani gitade, bading chiwalgiparangsan ong·aigija internet-ko champengatengani a·sel sorkari aro private office-rango kam ka·giparangba neng·nikanirangko chagrongna nangenga.
Ia sal somoirango chatro chatrirangba, internet gitasa class-rangko ra·na nanga ine janapatengon, internet dongjani a·sel chatro chatrirang, online class-rangko ra·na man·jaenga aro porikkana on·enggipa subject-rangkoba man·riktokjaengaha ine Marak parakataha.
Internet-ko antisa batpile chipe donatahani a·sel, sanna banani, bank-ni kamrang aro dingtang dingtang kamrangoba neng·nikanirangko chagrongna nangengaha ineba MPCC-ni working president parakataha.
Antisa batpile internet-ko champengatengani gimin sorkariko sing·doatengon, tom·tomaniko ra·bapilna gita sorkari, iana agre cholko nikjahama ine Marak matnangataha.
