ST certificate-ni bidingo ‘skatang’ u·iataniko on·a ine gitcham CEM-ko sorkari matnanga

SHILLONG: Garo Hills Autonomous District Council (GHADC) election-o susagiparang Scheduled Tribe (ST) certificate donggiparang ong·na nanggen ine u·iataniko on·anio, kam watanggipa Chief Executive Membor (CEM) Albinush R Marak, Executive Committee aro Council-ko re·badee an·tangni ‘ska gitasa’ on·aha ine a·dok sorkari matnangataha.
A·dokni Deputy Chief Minister aro District Council Affairs (DCA) Minister Prestone Tynsong-ni kobor ra·timgiparangna talataniko on·ani gitade, ST certificate-ni bidingo u·iataniko on·anio GHADC-ni gitcham CEM, EC-ni chu·gimik membor-rang baksa chanchirimchenggija aro council-o parakchenggijasa an·tangari u·iataniko on·aiaha aro iandake niamko ja·rikgija u·iatani a·selsa High Court, ia u·iataniko den·galataha.
Marak-ni iandake ‘skatang’ ja·kuko de·ani gimin sak 21 MDC-rang, uni kosako No Confidence Motion-ko dakna gita Special Session-ko ong·atchina a·dokni Governor-ko gronge didieahachim indiba Sombar salo, Special Session-ko ong·atna skangan ua CEM-ni kamko watskaaha.
Marak-ni kosako No Confidence Motion-ko dakna tik ka·aniara, GHADC election-na National People’s Party (NPP)-ni tikitko on·anio maming nangchakeani dongja ineba DCA Minister aro NPP-ni state president Tynsong parakataha.
Tynsong-ni aganani gitade, sak 21 MDC-rang an·tangtangsa, CEM-ni kosako No Confidence Motion-ko dakna gita Governor-ko grongeaha.
Ia bilsini GHADC election-na Siju constituency-o NPP-ni tikitko Albinush Marak-na on·gija sakgipin candidate-nasa on·skaahachim ine nikna man·a.
“District Council-ni CEM aro Chairman-kode jinmasa seoka aro ian aino pangchakgipa kamrangsa ong·a. CEM ba Chairman-ko ra·galna nangnikenga ong·ode House ning·o bang·batgipa membor-rangsa man·a,” ine Tynsong aganaha.
GHADC election-o susagiparangna ST certificate-ko nangtelgipa ong·atanio Marak an·tang saksan ja·kuko de·ani a·selsa ia obostaona sokaha ineba ua aganaha.
Iani bidingo u·iataniko on·na skang GHADC-ni CEM, jinma chanchirimna gita Council-ona ra·bachengna nangachim ineba Tynsong talataniko on·angaha.
“Iako Council-ona ra·bachengna nangani ong·on maini gimin ua saksansa iako soi ka·aha?” ine Tynsong sing·doaha.
EC aro Council-ni niamko pe·e an·tangni skako dakahani giminsa pilak MDC-rangan uni kosako chakataha ineba ua aganaha.
Party tikitko Marak-na on·jani gimin sing·on, “Tikit on·ani ba jechakanide party ge·antion ong·aia. Nang·na party tikitko on·jani gimin na·a niamni kosako re·na man·aigen ia katta ong·ja,” ine a·dokni Deputy CM aro DCA Minister parakataha.