Curfew-ko pring 6 bajioni attam 6 bajiona neng·takata
TURA: West Garo Hills a·jao, mongsongbate Chibinang jol aro Tura-o manderangni ding·chaoe so·sojengjeng ong·anirangko batanggimin sal somoirango nikna man·ahani gimin tom·tomaniko man·srangkujaskal, West Garo Hills a·jani District Magistrate, Bharat Nagarik Suraksha Sanhita (BNSS)-ni Section 163-ni ning·o, March-ni 18 tarik Budbar pring 6:00 bajioni March 19 tarik Bristibar pring 6:00 bajiona curfew-ko ra·dodapattaiaha.
Indake ong·genchimoba, manderang an·tangtangna nanga bosturangko koros ka·na aro dingtang dingtang kamrangko ka·na man·na gita curfew-ko March-ni 18 tarik Budbar salo, pring 6:00 bajioni attam 6:00 bajiona neng·takatenga ine District Magistrate u·iataha.
March-ni 18 tarik pring 6:00 bajioni attam 6:00 bajiona curfew-ko neng·takatengani gimin skul-college-rang, office-rang, bank-rang aro pilak dokkanrangan dongimin somoi gita kulina man·aigen ineba District Magistrate u·iataha.
Curfew-ko darangba pe·jachina gita West Garo Hills a·jani ning·o an·tangtangna on·gimin bilrangko jakkale, nirokchina gitaba District Magistrate, niam reti rakkigipa bimangrang, executive magistrate-rang aro police officer-rangna ge·etaniko on·ataha.
