GH-ni Tribal-rangko chel·chakchina Tura MP, ma·mong sorkariko didia

NEW DELHI: Bangladesh aro gipin biaprangoni manderang, Garo Hills-ona napsrukenba, Tribal-rangko, mongsongbate A·chikrangko chadrapna jotton ka·enga aro manderangni gam-jinrangko nisie galna jotton ka·enga ine Budbar salo, Tura-ni MP Saleng A Sangma, Garo Hills-o songdongenggipa Tribal-rangko iandakgipa manderangoniko chel·chakchina gita ma·mong sorkariko didiataha.
Iani bidingo, Union Home Minister Amit Saha-na sedoatengon, Tura Lok Sabha constituency-o songdongenggipa Tribal-rangni janggirangko aro gam-jinrangko chel·chakna gita ta·raken ja·kuko de·china Tura-ni MP didiataha.
A·song damgnini simarango iandakgipa obostarang namjabatengani gimin a·songni Prime Minister Narendra Modi-chi dilenggipa Cabinet Security Committee, iani bidingo ta·raken ja·kuko de·na nangenga ineba Sangma parakataha.
West Garo Hills a·jani Rajabala, Tikrikilla, Phulbari aro uandakgipa biaprango, Tribal ong·gijagipa manderang, Tribal-rangni kosako ka·mikkenatna lekka pal·takrangko tapenga ine janapatengon, ia manderang, Tribal-rangko ia bilsini gisepon Garo Hills-ni a·jarangko wate katchina ka·mikkenataha ine Tura MP parakataha.
Adita salrangna skang A·chik sakgniko so·otgipani bidingo aro A·chikrangni nokrangko so·chipe galgipani giminba Tura MP, Union Home Minister-na sedoatgipa chittio janapataha.
“March-ni 9 tariko, Chibinang Bazar-o donggipa mande saksani dokkanko nisie galaha aro Ama Mariani mangkrongkoba pe·e galaha. Iandakgipa kamrangni a·sel Garo Hills-o songdongenggipa manderang, namen gisik saatako man·aha,” ine Sangma parakataha.
Police-rangni koborko man·soani gitade, ia kamrangko gipin biaprangoni napsrukbagipa manderangan ka·aha ineba Sangma parakataha.
Sangma-ni parakatani gitade, iandakgipa kamrangni a·selan Garo Hills-o songdongenggipa Tribal jatrang aro ISIS bobil dolchi dakchakako man·enggipa Rohingya dolrangni gisepo dinggrikanirangna kenchakna nangani ong·enga.
Nangani kri ma·mongni sipai dolrangko donatchina Union Home Minister-ko didiatengon, ADC election-ko da·o jadokna ra·dodapatani ja·man Garo Hills-o ong·enggipa obostarangko namatna gita ta·raken ja·kuko de·na nangchongmotenga ine Tura MP parakataha.