TURA: Batanggimin sal somoirango, Garo Hills-ni dingtang dingtang biaprango so·sojengjeng ong·anina rim·a man·gipa dingtang dingtang dolni dilgiparangko ta·raken watpilchina Garo Hills-ni Nangrimgimin A·chik Dol (NAD), a·dok sorkario dabiangaha.
“GSMC-ni acting chairman aro NAD-ni vice president Balkarin Ch Marak, ACHIK dolni dilgipa Johnny A Marak aro je dilgiparangkon, batanggimin sal somoirango Garo Hills-o so·sojengjeng ong·anina rim·ahachim, ia pilak dilgiparangko ta·raken watpilchjina chinga dabienga. Ia dilgiparang aro manderang jinmaba an·tangtangni man·gnina so·sojengjeng ong·anio bak ra·jaha indiba Garo Hills-o songdongenggipa A·chik jatni bilrangko chel·chaknasa an·tangtangko on·kange chakataha,” ine NAD parakataha.
Indian Constitution-ni Article 244(2) aro Sixth Schedule-ni ning·o Tribal-rangna on·gimin bil aro niam retirangko chel·chaknasa jingjengatanirangko dakaha ine janapatengton, ia niamrangara ramram niamrang ong·ja indiba A·chik jat gita dakgipa Tribal-rangni a·a chia, daka rikani aro an·tangtangari sorkari chalaianiko chel·chakna on·gimin niamrangsa ong·a ine NAD parakataha.
“Garo Hills-o so·sojengjeng ong·anganiara, GHADC election-o Tribal ong·gijagipa manderangni bak ra·aniko jegalani bak gitasa ong·aha. A·chikrang an·tangtangna on·gimin bil aro niam retiko chel·chakna aro rakkina gitasa jinma chakatna nangao ga·akaha,” ineba NAD parakataha.
Article 19(1)(a)-ni ning·o mande sakantian ku·rang on·na aro jegalna gita bilrang donga aro Article 19(1)(b)-ni ning·o tom·tome tom·chimongnaba bil donga ine janapatskaengon, ia on·gimin bilrango pangchake manderang tom·chimonge ku·rangko on·on, manderangni ku·rangko sorkari daito baksa knachakna nanga ine NAD parakataha.
Rim·a man·gipa manderangni nokdangrangna bakrimaniko parakatengon, “Ia dilgiparangara bobil dake chakatgipa manderang ba ong·gija kamrangko ka·giparang ong·jachim indiba ia manderangni nokdangrang, uamangko bano donenga uko ma·sitokkujaenga. Uni gimin uamangko bano donenga, uko nokdangni manderangna u·iatna nanga aro uamangko grongna on·na nanga,” ine NAD, police aro sorkario dabiangaha.
Ia dilgiparangko ta·raken watpilchina aro ia a·selni bidingo rim·ako dontongchina gitaba NAD, sorkario dabiangaha.
So·sojengjeng ong·anina rim·gipa manderangko watpilchina A·chik dolrang dabia
Date:
Share post:
