So·sojengjeng ong·anina police-rangsa sakki aro niamo pangchake rim·enga: CM
SHILLONG: Batanggimin sal somoirango, Garo Hills-ni dingtang dingtang biaprango so·sojengjeng ong·anirangko nikna man·angahani gimin Bristibar salo, a·dokni Chief Minister Conrad K Sangma, Deputy Chief Minister Prestone Tynsong baksa a·dokni Governor CH Vijayashankar-ko gronge, ia a·selni bidingo talate on·angaha.
Governor-ko grongeani ja·man kobor ra·timgiparangna talate on·angengon, batanggimin antignini gisepo ua Garo Hills-osa ong·engani gimin Governor baksa ku·siliting gitasa agangrikatna man·aiaha aro da·alo ua an·tangan ia a·selni bidingo talate on·na gita Governor-ko grongeaha ine Chief Minister parakataha.
“Batanggimin antignini bang·bata salrangon anga Garo Hills-osachim aro ua somoirango anga Governor baksa ku·siliting gitasa agangrikatna man·aiaha. Uni giminsa anga uona re·bae Garo Hills-o ong·anggipa a·selrangni gimin talataniko on·na nangnikaha,” ine Sangma aganaha.
Garo Hills-o ong·anggimin obostarangni gimin ua Governor-na chu·gimikkon talate on·aha aro ua an·tangba obostarangni gimin ma·sisoaha ineba ua aganaha.
Garo Hills-o da·o so·sojengjeng ong·anirang namkalangaha aro manderang tom·tomaniko man·na a·bachengengaha ineba Chief Minister parakataha.
“Garo Hills-o so·sojengjeng ong·anirang komiangaha aro da·o manderang tom·tome janggi tangna man·piltaiengaha indiba ding·chaopiltaianirang dongjana gita sorkari, obostarangko name nirokenga,” ine ua aganaha.
Garo Hills-o so·sojengjeng ong·anina rim·a man·gipa manderangko watpilchina dingtang dingtang dolrangni dabienggipani bidingo sing·anina aganchakaniko on·angskaengon, so·sojengjeng ong·ani bidingo police-rangsa sakki aro niamrango pangchake rim·enga aro ian police-rangni daitosa ong·a ine Chief Minister parakataha.
“Manderangko rim·ani giminde chinga iako talatna ska, niam retiko rakkianiara police department-ni daitosa ong·e, police-rang an·tangtangni sakkirangko man·ani kri aro niamo pangchakesa ja·kurangko de·enga. Ia obostani bidingo badita sakko rim·aha aro sako rim·aha anga an·tangde mamingkoba ma·sipaja. Ian police-rangni kamsa ong·a aro police-rangsa, sakki aro niamo pangchake rim·na nanggiparangko rim·enga. Anga chanchia iani giminde SP-sa talbate aganchakna man·gen,” ine Chief Minister aganaha.
Batanggimin sal somoirango, Garo Hills-ni dingtang dingtang biaprango so·sojengjeng ong·anichi komibeoba sakgni manderang so·otako man·aha aro bang·en saknaanirangko man·na nangahachim.
