NGO dilgiparangko rim·anichi CoMSO ding·chaobatna kenchaka
SHILLONG: Re·anggipa antio Garo Hills-o so·sojengjeng ong·gipa a·sel obostarangni bidingo mitam NGO dilgiparangko rim·anio Sorkarini maming jak dongja ine Sorkari an·tangtangko jaksugale ra·aha.
Garo Hills-o ong·anggipa obostani bidingo adita pressure group-ni dilgiparangko rim·aniara chu·gimikan Police-ni niamo pangchake kam ka·anisa, uano A·dok Sorkarini maming jak dongja ine Chief Minister Conrad K Sangma Bristibaro aganaha.
Police uamangni kamko niamo pangchake aro sakkirango pangchake ka·enga, badita sakko rim·aha ukoba u·ija, uarangko dakna gita Superintendent of Police-an uamangni a·jao bil donga, Chief Minister aganaha.
NGO dilgiparangko rim·e dongenchimode Garo Hills-o so·sojengjeng ong·anirang batesa batrorogen ine Confederation of Meghalaya Social Organisations (CoMSO)-ni kenchakani aro matnangani kattarangko aganani gimin Chief Minister indakgipa kattarangko aganchakaha. Tom·tomanina kam ka·na nangmiting somoio batesa NGO dilgiparangko rim·genchimode, manderangko ding·chaobatgen ine CoMSO vice-president Sambormi Lyngdoh re·anggipa Butbar salo kenchakani kattarangko aganahachim.
Garo Hills-o so·sojengjeng ong·anggipa a·sel obostani bidingo police ACHIK dolni Johnny A Marak aro Garo State Movement Committee (GSMC)-ni dilgipa Balkarin Marak mangko rim·aha.
Garo Hills-o mongsongbate West Garo Hills a·jao ia somoio tom·tomaniko nangchongmotenga, indiba ian a·dok sorkarini NGO dilgiparangko rim·e pattoko chipatanichi songsalo tom·tomaniko ra·baani pal batesa so·sojengjeng ong·atnaba gnang ine CoMSO-ni Vice chairman Sambormi Lyngdoh aganaha. Civil Society Organisation-rang songdonggipa sakantini nangnikaniko ku·rang on·gipasa ong·a unigisepon, uamangko pattoko donatanira kragipa kam ong·ja aro a·dok sorkarini iandakgipa ja·kurangko de·anichi songsalni manderang batesa sorkarini kamo ka·dongna man·jawa ineba CoMSO dilgipa aganaha.
