SHILLONG: Batanggimin sal somoirango Garo Hills-o so·sojengjeng ong·anggipani bidingo police-rangni skatang manderangko rim·anichi obostarangko namjabatatani cholrang donga ine Opposition dolni dilgipa aro a·dokni gitcham Chief Minister Mukul Sangma, mikrakataniko on·angaha.
Sonibar salo, a·dokni Governor CH Vijayashankar-na memorandum-ko on·eani ja·man, kobor ra·timgipa manderang baksa agangrikengon, so·sojengjeng ong·anio jak dongama dongja, uarangko name sandirokchenggija police-rang, manderangko skatang rim·enga ine Sangma aganenba, iandake manderangko skatang rim·ani a·sel manderangko ding·chaobatatna, so·sojengjeng ong·aniko ra·bapilna aro dos donggipa manderangko rim·ani pal, dosgri manderangkosa sasti on·skaani cholrang donga ine Sangma parakataha.
So·sojengjeng ong·aniko namatna ja·ku de·enga ine mesoknamangmang manderangko rim·aniara, manderangna ka·donganiko ra·baani pal, batesa so·sojengjeng ong·aniko ra·bapilani cholrang donga ineba opposition dolni dilgipa, mikrakataniko on·angaha.
Manderangko rim·na skangde, obostarangko name sandirokchengna nanga, sakki baksasa police-rang ja·kuko de·na nanga aro niamo pangchake manderangna on·gimin bilrangko mande ra·na nanga ineba Sangma aganaha.
Garo Hills-o so·sojengjeng ong·anina dingtang dingtang dilgiparangko rim·engani gimin adita salrangna skangsan Confederation of Meghalaya Social Organisations (CoMSO)-ba jajrengchakaniko parakatahachim.
Garo Hills-o tom·tomanikosa ra·bapilna nangengon, iandake dingtang dingtang dolni dilgiparangko rim·aniara, so·sojengjeng ong·aniko ra·bapilani cholrang donga ine CoMSO-ni vice president Sambormi Lyngdoh aganahachim.
Garo Hills-o so·sojengjeng ong·anina police-rang, da·o dipet ACHIK dolni dilgipa Johnny A Marak, Garoland State Movement Committee-ni acting chairman Balkarin Ch Marak aro gipin manderangko rim·ahachim ine nikna man·a.
So·sojengjeng ong·anina skatang manderangko rim·anichi obostako namjabatatnaba gnang: Mukul
Date:
Share post:
