SHILLONG: Congress, National People’s Party (NPP) aro United Democratic Party (UDP)-ni mitam dilgiparang, bakan Bharatiya Janata Party (BJP)-o napangani cholrang donga ine Meghalaya Pradesh Congress Committee (MPCC)-ni president Vincent H Pala parakataha.
Pala-ni aganani gitade, Congress dolni dilgipa PN Syiem-ba BJP-o napna miksonganirang dongani giminsa party-oni ong·kataha aro da·o ua, NPP aro UDP-ni adita dilgiparang baksa BJP-o napna miksongenga.
“Syiem, bilna mikpakma niesa Congress doloni ong·kataha aro da·o ua BJP-o napskana miksongenga,” ine MPCC-ni president aganaha.
PN Syiem, Ronnie V Lyngdoh aro Charles Marngar-sa District Council-o Congress dolko, NPP baksa kam ka·rimatgiparang ong·a ine janapatengon, ua somoio ua, uamangni kamrangna kusi ong·jachim ine Pala aganaha.
Obostarangko name nipilani ja·man KHADC-o NPP-chi dilenggipa Executive Committee-o bakrimaniko ra·pilchina gita uamangko Congress draaha ineba Pala aganaha.
“Batanggimin chang MDC election-o chinga amako man·on ua (Syiem), suk ong·jaha. Ua bilo ong·na sikgipa mande ong·ani gimin Congress dolo ong·chae dongna nangnikjaha,” ine Pala aganenba, Congress aro BJP-de miksonganirang namen dingtanggrikani gimin apsan kamrangko ka·rimna man·jawa ine parakataha.
“Da·o Syiem, NPP aro UDP-ni adita dilgiparang baksa BJP-o napna siengaha aro chinga iako nie dongchengna miksongenga,” ine MPCC president aganaha.
