TURA: Batanggimin salrango Garo Hills-o so·sojengjeng ong·anina West Garo Hills a·ja gimikon wine store ba chu dokkanrangko chipe donatani ja·man, da·o chu dokkanrangko sal 12:00 bajioni attam 3:00 bajiona kulichina West Garo Hills a·jani District Magistrate ge·etaniko on·angaha.
Garo Hills-o, mongsongbate Tura aro Chibinang jolrango so·sojengjeng ong·angani ja·man gipin a·jarangode chu dokkanrangko kuliengoba, West Garo Hills a·jaode chu dokkanrangko kulina on·kujaengachim ine nikna man·a.
West Garo Hills a·jao chu dokkanrangko salni 12:00 bajioni attam 3:00 bajiona kulichina ge·etaniko on·atengon, chu dokkanrango agre manderangko tom·chimongna on·jachina, chu dokkanrango churangko ringna on·jachina aro chu dokkanrangko somoi gita kulie somoi gita chippilchina District Magistrate, chu dokkan nokgiparangna ge·etaniko on·ataha.
Chu dokkanrangko kuliengmiting somoirango police-rang, nanga gita nirok sandianirangko dakanggen ineba District Magistrate u·iataha.
West Garo Hills a·jao attam 6:00 bajioni pring 6:00 bajiona walni curfew-ko ra·gatkuenga ineba nikna man·a.
