TURA: Adita salrangna skang, chong·motan re·anggipa March-ni 10 aro 11 tarikrango, Garo Hills-ni dingtang dingtang biaprango so·sojengjeng ong·anichi neng·nikanirangko chagrongna nangahani gimin Garo Hills-o tom·tomaniko ra·bapilna gita pilakkon ku·cholsan bakrime kamko ka·china aro ding·chaoatani kamrangko dontongchina Tura-ni adita ma·a paarang, Garo Hills-o songdongenggipa manderang pilakkon mol·molataha.
“Pilakna skangba chinga West Garo Hills a·jani Administration Head aro Superintendent of Police baksana uamangni sub-ordinate officer-rang pilakkon indita ta·rakprete wal·chabaenggipa kenaniko ta·raken dim·dematna man·ahani gimin jat gimikni pal mittelchengna namnika. Na·simang cha·dang ringdanggija tuna dongna man·pilgija rakbee kam ka·anichi wal·sareko chi rudapa gita wal·kimitna man·aha. Jatni pal chinga na·simangko mittela,” ine A·chik ma·a paarangni pal, Ma Crisline T Sangma, Pa Gredalson C Momin, Pa Gredenson M Marak aro Pa Lyndon K Sangma, seachi parakataha.
Mitam NGO-ni dilgiparangko rim·ani gimin manderangni gisiko jajrengani aro kenchipchipani ong·katenga gita nika ine janapatengon, “Bang·a ma·a paa aro chadamberang iako ma·sisrete, golmal a·bachengatgiparangkode rim·gija, dosgri NGO-ni dilgiparangkosa rim·enga ine social media-rango vlog tarie watjojoenganiara namen dal·a gualani ine chinga A·chik ma·a paarang na·simangko indake dakpajachina mol·molatenga. Indaka video-rangko niksoode manderangni gisikrangko ding·chaoata-bate ka·o nangata. An·ching A·chikrangde da·sininba ka·onangako chakna man·jaode chanchichenggija bingbang jebasi dakna jotton ka·ronga. Iako dakanichi a·songni-sorkarini niam retiko pe·a aro an·tangtangko kapangpile on·a ga·aka. Na·simang bilchi jakchi dokja satjaoba indaka video-rangko viral ka·atachi manderangni gisikko ding·chaoataniara namen gualani ong·a. Indaken ja·manode dal·a kajia golmal-an·chi pari nikaonaba sokpilnaba donga. Uni gimin chadamberang iako gisik ra·pabo,” ine A·chik ma·a paarang mol·molataha.
Iandake ding·chaoatani kamrangko ka·ani pal, a·songo tom·tomaniko ra·bana gita A·chik sakantian, District Administration aro Police officer-rang baksa meli-nangrime ku·cholsal kamko ka·na ineba A·chik ma·a paarang, ku·monganiko on·ataha.
Badiaba bobil doloni jatko ba a·songko ka·mikkenatenga ong·ode aro iani bidingo saoba ma·sia ba nikenga ong·ode, uko video ka·e, ua mandeni gimin chu·gimikko see, an·tangni biming aro chu·gimik address baksa DC ba SP-na u·iatna man·gen ineba A·chik ma·a paarang mol·molataha.
Magistrate-rang aro Police officer-rangsa jatko aro a·songko chel·chakgiparang aro tom·tomaniko ra·bana kam ka·giparang ong·ani gimin uamang baksa bakrimaniko on·e dakchakgrimgenchimode a·song bakan tom·tompilgen ineba A·chik ma·a paarang parakataha.
“Je obostarang ong·angaha uarang badeangjok. Uni gimin ka·sara jong-ada no-abi sakanti, songko dilenggipa Nokma-Sanirang, chadambe me·tra panterang, chingni agan-skiatako knatimpabo. Saksa sakgipinko mikneng mikbugija matnange dosgale potchipjana-batesa apsan ku·cholsan kam ka·rimna hyai. Hai an·ching damsan ja·ku de·na, jatni golmalko ta·rake tom·tomaniona ra·bana, unikoa pilak obostarangko Isolna pakwate Uo bebera·e ka·donge an·ching mil·am seppi de·gija, bilakbatsranggipa Isolni sipairang an·chingna dakgrikchakchina Uo bi·na hai,” ine A·chik ma·a paarang didiataha
GH-o tom·tomaniko ra·bapilna pilakkon bakrimchina A·chik ma·a paarang didia
Date:
Share post:
