SHILLONG: Re·anggipa 2024 bilsini Lok Sabha election-o Bharatiya Janata Party (BJP), Meghalaya a·dokni damgni Parliamentary constituency, chong·motan Shillong aro Tura Lok Sabha constituency damgnion susagija, National People’s Party (NPP)-na chakpaaniko on·ahaoba da·o ong·atna sienggipa Shillong Lok Sabha by-election-ode susatelgen ine parakataha.
Re·anggipa February-ni 19 tariko, Shillong-ni Lok Sabha MP Ricky Andrew J Syngkon-ni tanggitik saaniko man·e siangani ja·man da·o Shillong Parliamentary Constituency-ni by-election-ko ong·atna nangengachim ine nikna man·a.
Shillong Parliamentary by-election-ko ong·atanio BJP susatelgen ine janapatengon, da·o dipet candidate-ko seokani giminde party-ni dilgiparang chanchirima dongkuja ine BJP-ni state general secretary Wankitbok Pohshna parakataha.
2024 bilsini Lok Sabha election-o susana gita BJP-ni high command-ko didijahani gimin bang·bata party worker-rangan, BJP-ni state president Rikman G Momin-ni kamo kusi ong·gijaniko mesoktokahani gimin ia chang Shillong Lok Sabha by-election-ode a·dokni BJP-ko dilgiparang susana gita tik ka·angaha ine kobor on·aha.
United Democratic Party (UDP)-ni gitcham general secretary aro gitcham MLA Jemino Mawthoh, BJP-o napna miksongenga ine jangbingbanganikode Pohshna raken jegalataha aro ian manderangni chanchichipanisan ong·aia ine parakataha. Mawthoh, BJP-ona re·bana kusi ong·genchimode uamang uko rimchaksona kusi ong·begen ineba ua aganaha.
Shillong Parliamentary by-election-o BJP, gipin dolrang baksa bakrimgija, an·tangari jakgitele susana miksongenga ine adita salrangna skangsan, BJP-ni spokesperson Mariahom Kharkrang parakatahachim.
Shillong Lok Sabha by-election-ni bidingo party-ni dilgiparang chanchirimna a·bachengaha aro tom·aniko ong·atchina gita ma·mongni party dilgiparangkoba didiataha ineba Kharkrang aganaha.
Ma·mongni party dilgiparangosa pilakan pangchakaigen ine janapatengon, ma·mongni dilgiparang ge·eta ong·ode uamang ia by-election-oba gipin party-ni candidate-na chakpana nangaigen ine Kharkrang parakataha.
2024 bilsini Parliamentary election-oba BJP susagija, NPP-ni candidate-na chakpaaniko on·skaahachim ine nikna man·a.
Indake ong·genchimoba 2024 bilsio, Shillong Lok Sabha seat-ko Voice of the People’s Party (VPP) aro Tura seat-ko Congress cheskaahachim.
