GH-o so·sojengjeng ong·aniko NPP baksa ‘chal’ daka inako BJP jegala

SHILLONG: Garo Hills-o so·sojengjeng ong·aniara, Bharatiya Janata Party (BJP) aro National People’s Party (NPP)-ni nangrime ‘chalakki’ dakani a·selsa ong·engnaba gnang ine adita salrangna skang, Congress dolni matnanggipa kattarangko BJP raken jegalataha.
Garo Hills-o so·sojengjeng ong·aniara BJP aro NPP-ni nangrime, ‘chalakki’ dakani a·selsa ong·engnaba gnang ine Meghalaya Pradesh Congress Committee (MPCC)-ni president Vincent Pala-ni matnanggipa kattarangko jegalatengon, uni iandake agangipa kattarangara, manderangko dilsretna jotton ka·anisa ong·enga maina Congress dolonin membor saksa manderangni kosako ja·kuko de·ahani a·selsa so·sojengjeng ong·anirang ong·kataha ine BJP-ni state vice president aro Tura-ni MDC Bernard N Marak matnangatskaaha.
Garo Hills-ni manderang, Tribal ong·gijagipa manderangni bak ra·aniko jegaltokengon, Congress dolni Muslim candidate saksa, sriksrik nomination file ka·na Tura-ni DC office-ona re·angani ja·mansa so·sojengjeng ong·na a·bachengaha ine Marak matnangataha.
Marak-ni parakatani gitade, ia candidate, nomination file ka·na skang a·dokni Chief Minister, Deputy Chief Minister aro Opposition dolni dilgipa baksa agangrikchengaha ine aganaha indiba uni janggilo donggipa MPCC-ni president Pala aro Congress dolni gipin dilgiparangkode ua biming mingjaha.
Congress dolni BJP aro NPP-ko matnangronga gita Pala-ba da·o apsan daken BJP aro NPP-ko matnange, an·tangtangni kamrangna Mominin-kosa jinmani mikkango dos donggipa gita mesokna jotton ka·skaenga ineba Marak aganaha.
Mominin-ni Congress-o bak ong·aniko Pala jegaljaha ine janapatengon, ua (Mominin) gitcham MLA aro gitcham MDC-ba ong·e da·o Congress dolni membor-an ong·engkua ine Marak parakataha.
Mominin-ni kamrangna Pala, daiko ra·na nanga ineba BJP-ni state vice president dabiangaha.
“Phulbari-ni gitcham MLA Mominin, Congress party-ni bakan ong·kuengani gimin ia so·sojengjeng ong·atanio Pala, an·tangni dosko ku·rachakna nanga,” ine Marak aganaha.
So·sojengjeng ong·anina rim·a man·gipa bang·bata manderangan BJP-ni membor-rangsa ong·a ine matnanganiko jegalatskaengon, rim·a man·gipa manderangni bimingrangko aro ia manderangni gimin talataniko on·china Marak, Pala-o dabiangaha.