WILLIAMNAGAR: Mongolbar salo, East Garo Hills a·jani District Tuberculosis Office-ni gita World Tuberculosis (TB) Day-ko Williamnagar-ni Ampangdamgre kal·chakramo manidilangaha aro ia salko manianio, 100 Days Campaign-ni gnigipa bakkoba a·bachengatjolaha.
Ia 100 Days Campaign-ni gnigipa bako, East Garo Hills a·jani dingtang dingtang biaprango TB sabisini bidingo sal 100-na agan-talatanirangko on·angan baksana TB saenggipa manderangko, sanne banne on·na kamrangko ka·anggen.
Ia program-ko ong·atanio, East Garo Hills a·jani Additional Deputy Commissioner (ADC) Diana Sangma, tom·anio bak ra·giparangna aganprakangengon, TB sagipa manderangni sanna bananiko ra·na kratcha·ani aro songsalo manderangni mitchiako man·ani gimin janapangenba, TB sagipa manderangko mitchijachina indiba ka·sae nirok sandianiko on·china didiangaha.
TB saaniko champengna aro sanna gitaba man·aia ine janapangengon, somoi gita check up ka·e sanna bananiko ra·genchimode manderangni janggirangko jokatna man·a ine Sangma aganaha.
An·tangtangko porikka ra·e nina re·bachina TB sagipa manderangko didiatengon, TB sagipa manderangko an·sengpilna on·na gita sanna bananirangko ra·engmiting somoirango bakrimaniko on·china gita ua jolo songdongenggipa manderangko, sanna banani kamrangko ka·enggiparangko aro sagipa manderangni nokdangrangkoba mol·molangaha.
Ia program-ko ong·atanio, DTC Williamnagar-ni Senior Medical & Health Officer Dr SR Marak, rimchaksoani kattarangko aganangaha aro Dr Chrissie Pearly Sangma, ia program-ni bidingo agan-talataniko on·angskaaha.
Ia program-ko ong·atanio,TB Free Villages ba TB saani grigipa songrangna boksisrangko on·angaha aro TB sagiparangko porikkaba ra·e niangjolaha.
