RESUBELPARA: Budbar salo, New Delhi-o donggipa Indian Council of Historical Research (ICHR)-ni dakchake on·anichi, Mendipathar College-ni History Department, Political Department aro IQAC baksa nangrime, ‘Freedom Movement of India and its Post-Independence Development with Special Reference to the State of Meghalaya’-ni bidingo National Seminar-ko ong·atangaha aro ia seminar-o dingtang dingtang institute-rangoni skigiparang aro chatro chatrirang gimik sak 200-mangni gita bak ra·angtokaha.
Ia National Seminar-ko ong·atanio, North Garo Hills a·jani Deputy Commissioner Dr Abhishek Saini, mongsonggipa sokgipa ong·e bak ra·angaha aro ia seminar-o NEHU Tura Campus-ni ning·o donggipa History aro Archaeology Department-ni Associate Professor Dr Doneti Sivaji, Tura Don Bosco College-ni ning·o donggipa History Department-ni Associate Professor aro Captain Williamson Sangma State University-ni Guest Faculty Dr Sanggra A Sangma, dingtang dingtang institute-ni skigiparangna aro chatro chatrirangna, katta bichongo pangchake agan-talatanirangko on·angaha.
Ia National Seminar-o ming 25-mangni gita paper-rangko, katta bichongo pangchake dingtang dingtang manderang, agan-talate on·angaha.
