SHILLONG: Meghalaya a·dokni bang·a chadamberangan gipin biaprango kamrangko ka·e cha·na cholrangko man·gen ine gipin a·dokrangona okamatako man·e cha·bokako man·rongengani gimin iani bidingo nanga gita ja·kurangko de·china Tura-ni Lok Sabha MP Saleng A Sangma, India sorkari aro a·dok sorkariko didiataha.
Sangma-ni parakatani gitade, a·doko lekka pora donggipa aro donggijagipa chadamberangba, gipin biaprango kamrangko ka·e cha·na cholrangko man·gen ine dingtang dingtang biaprangona okamatako man·e cha·bokako man·rongenga aro ian chadamberangna namen kenchakna nangani ong·enga.
“Lekka pora donggipa, donggijagipa aro kamgri ong·e dongenggipa chadamberang pilakan janggi tangani cholrangko sandiengani gimin bang·a changon, gipin biaprango kamrangko man·gen ine u·iatanirangchi dilsretako man·enga. Gipin a·dokrangona kamrangko ka·na re·angon a·dokni chadamberang, cha·bokako man·rongenga,” ine Tura MP parakataha.
Bang·bata chadamberangan a·dokoni re·angahaode cha·bokako man·rongenga ine janapatengon, “Chadamberang gipin a·dokrangona re·angahaode ong·katpilna man·rongjaha. Iandakgipa obostarang an·chingni a·dok ning·osan ong·enga ong·ja indiba gipin a·dokrangoba ong·enga,” ine Sangma parakataha.
Kamrangko on·gen ine tol·e chalaienggipa institute-rangni giminba Sangma mikrakataniko on·angaha.
“Meghalaya a·dokoba university-ko classroom ge·gni ge·gittamchian kulienga. Iandakgipa institute-rango ka·dongchakna man·ani dongja,” ine Sangma aganaha.
Batanggimin salrango ong·gipa obostarangni gimin janapatengon, bilsi sokkugijagipa Khasi chadamberangko, noti dari dakgipa biaprango ka·ataniko knasona man·aha ine Sangma parakataha.
Salgro salaram jolni chadamberang, gipin a·dokrango chonnik onnikaniko aro kal·stekanirangko chakna nangronga ineba Tura MP, suk ong·gijaniko parakataha.
A·dokni manderang, gipin biaprangona songre songgabatani somoirango gimarongengani giminba Sangma, mikrakataniko on·angaha.
Chadamberang gipin biaprango cha·bokako man·engani gimin Tura MP mikrakata
Date:
Share post:
