SHILLONG: Garo Hills Autonomous District Council (GHADC)-ni term-ko jadokna ra·dodapataniko bakkandikatenba, GHADC election-ko jagnini gisepon ong·atchina a·dokni Bharatiya Janata Party (BJP), a·dok sorkario dabiangaha.
BJP-na ku·wattimgipa aro a·dokni gitcham IPS officer M Kharkrang-ni aganani gitade, GHADC election-o susagiparang, Scheduled Tribe (ST) certificate dongna nanggen ine u·iataniko on·ani ja·manba Tribal ong·gijagipa manderangoni saksa, election-o susana gita nomination file ka·drana jotton ka·ani a·selsa Garo Hills-o ding·chaoe so·sojengjeng ong·aha.
Phulbari-ni gitcham MLA SG Esmatur Mominin, GHADC-ni u·iataniko manigija, election-o susana gita nomination file ka·drana jotton ka·ani a·selsa Garo Hills-ni manderang ding·chaona a·bachengaha ine janapatengon, uni iandakgipa kamara District Council-ni kosakon ra·biani gita ong·aha ine Kharkrang parakataha.
“Ua High Court-ni rai on·aniko sengna nangachim indiba ua manderangni jegalako manigija ja·ku de·aha aro GHADC-ni bilkoba ra·biaha. Iani a·selsa Garo Hills-o so·sojengjeng ong·na a·bachengaha,” ine Kharkrang aganenba, Garo Hills-o so·sojengjeng ong·anina iandake manderangko ding·chaoatgipa manderangni kosako rakgipa ja·kurangko de·na nanga ine dabiangaha.
Election-rangko ong·atna gitade pangnan tom·tomaniko nanga ine janapatengon, Garo Hills-o tom·tomaniko ra·bapilna man·aha ong·ode sorkari, jadokna senggija ta·raken election-ko ong·ataina nanga ine BJP-ni dilgipa didiataha.
Garo Hills-o so·sojengjeng ong·aniko ra·baanio BJP-sa politics kal·a aro BJP-na kam ka·giparangan jak donga ine matnanganikoba ua raken jegalataha.
“Manderang je gitaba matnangnade man·aia indiba BJP, darang dol ba toromni kosako iandake so·sojengjeng ong·aniko ra·bagipa dol ong·ja,” ine Kharkrang parakataha.
