Meghalaya aro Assam sima arini aro election-ni bidingo chanchirima

TURA: District Administration aro West Garo Hills aro Goalpara-ni police baksa ku·mong nangrimgrikanina tom·aha.
Goalpara-ni District Commissioner & District Election Officer, Shri Pradip Timung, baksana a·gipi Superintendent of Police, Shri Navneet Mahanta, Meghalaya a·dokni West Garo Hills-ona mejal wenbaaha aro district administration aro police official-rang baksa tom·anio chanchirimaha.
Tom·anio dingtangmancha sima ari biaprango namgija kam ka·arangko champengna aro election-ni somoio niam riti-rangko rakkina nanganio chanchibataha. Ia agangrikanio Goalpara-ni Additional District Commissioner, Shri Navjit Pathak, aro Election Officer, Smt. Pallavi Bora-ba dongpaaha.
Garo Hills-oni Deputy Commissioner Shri Vibhor Aggarwal, IAS; Superintendent of Police Shri Abraham T. Sangma, IPS; Additional District Commissioner (Election) Shri Nipon Hajong; Assistant Commissioner Shri Fillerbom Marwein aro uamang baksana Excise Superintendent, District Transport Officer, aro sakgipin official-rangba tom·anio dongpaaha.
West Garo Hills-ni district headquarter Tura-ni Circuit House-o district ge·gnioni a·gipi official-rangni tom·aniko ong·ataha. Tom·anio West Garo Hills district administration aro police, Goalpara district-o Assam Legislative Assembly general election 2026-ko ong·atanio name dake chu·sokatna man·a gita chu·gimik bakrimpaaniko on·a ka·dongataniko on·angaha.
Meghalaya a·dok baksa Goalpara district km 150 sima arirangko sualgrike donga. Election-na tarisamsoengon Goalpara district administration aro police, North Garo Hills district administration baksana apsan dakgipa tom·aniko ong·gen ine parakataha.
Niam riti-rangna agreba, election-na West Garo Hills-oni mitam garirangko name dake nirikichina Goalpar district administration mol·molangaha aro apsan dakgipa on·a authority-rangba namnikpaaha. Model Code of Conduct-ko ra·gatani somoio damgni district-rangni sima ari biaprango rakgipa nirikaniko dakna chanchidapangaha.
Election-na nangchapgipa golmalrang, songsalni kosako namgijagipa kamrang, pekgipa samrangko badingsrukanirango aro niamgri churangko badingchiwalaniko champengna bilakbate bakrimanio kam ka·na damgni district administration-rang chanchiaha. Lekka puonani somoio golmal a·sel ong·anirangko champengna sima arini polling station-rango bilakgipa chel·chakgipa dolrangko donangnaba chanchiaha. Election-ko tom·tome matchotatna man·a gita bakrimaniko aro agangrikatanirangko dakangkuna damgni district-rangni administration dilgiparang namnikgrikaha. Ge-1010 polling station-rangoni ge-72 polling station-rangko Goalpara Meghalaya a·dok baksa sualgrike donga.