TURA: Garo Hills Autonomous District Council (GHADC)-ni ning·o on·enggipa a·a pattana dongimin somoi ia March jani 31 tarikon bon·engahani gimin a·a patta donggipa pilak manderangkon, April 1 tarik dipet an·tangtangni a·a pattarangko ‘renew’ ka·china ba gital dake taritaipilchina gita GHADC-ni Executive Committee u·iataha.
Iani bidingo u·iataniko on·angengon, GHADC-ni a·a pattarangko 1886 bilsini Assam Land Revenue Regulation-o pangchake bilsi 10-prakna tarie on·ronga aro ia dongimin somoi, ia March jani 31 tarikon bon·engahani gimin 2026 bilsini April 1 tarikoni 2036 bilsini March 31 tarikona gital dake a·a pattarangko tarina nangani somoi ong·engaha ine GHADC-ni Executive Membor (EM) aro Garo Hills United Alliance (GHUA)-na ku·wattimgipa Cherak W Momin parakataha.
Iani bidingo, GHADC-ni ning·o a·a patta donggipa pilak manderangkon, April 1 tarikni gisepon GHADC-ona re·bae an·tangtangni a·a pattarangko bilsi 10-na gital dake tarichina aro gamna nanganirangko gamchina gita Momin didiataha.
Indake ong·engon, GHADC-ni delimitation committee-na songe dongimin gitcham chairman, a·gilsakko watangahani gimin Sukrobar salo, Executive Committee (EC) tom·aniko ong·atangenba, delimitation committee-ko dilna gita gital chairman-ko songani bidingo chanchirimangaha ineba Momin parakataha.
“Delimitation committee-ko dilna gita da·o dipet chairman-ni kam bangbang ong·e dongkuengani gimin da·al salni bako Executive Committee tom·e chanchirimenba, District Council Affairs (DCA) department-ni gita, Governor-ni namnikanio pangchake, gital delimitation committee-ko songe kamrangko ka·anggen ine tik ka·e donangaha,” ine GHADC-ni CEM Cherak Momin parakataha.
