SHILLONG: Meghalaya a·doko niam gri koela bikotaniko champengna sorkari rakbee kamrangko ka·engon, East Jaintia Hills a·jani Sutnga jolo donggipa Wailong songo, niam gri chalaienggipa koela a·kolko police-rang chadrapeaha aro ia koela a·damo kam ka·enggipa saksku manderangkoba rim·aha.
Koborko man·soani ja·man East Jaintia Hills a·jani police-rang, ia koela a·kolko re·anggipa Sukrobar salo chadrapeaha aro ia koela a·damo mande saksku kam ka·enga ine nikna man·aha.
Ia koela a·kolko chadrapeani ja·man, Khliehriat Police Station-o mokordoma ka·aha aro iani bidingo ning·tubate sandirokna a·bachengataha.
Re·anggipa February jao, East Jaintia Hills a·jao niam gri chalaienggipa koela a·dam gopretanichi sak 32 manderang sina nangani ja·man, mikkangchi iandakgipa a·selrang ong·taijana gita a·jao niam gri chalaienggipa koela a·damrangko chipkamatchina gita a·dok sorkari ge·etaniko on·ahachim ine nikna man·a.
Batanggimin bilsirangonin niam gri chalaienggipa koela a·damrangko champengchina gita a·dok sorkari, district administration-rangna ge·etaniko on·engoba a·dokni dingtang dingtang biaprango, niam gri koelarangko bikotengkua aro adita salrangna skangsan, East Jaintia Hills a·jao niam gri koelarangko bikotani a·sel, sak 32 manderang sina nangahachim.
Meghalaya a·dokni koela a·damrango niam gri koela bikotako dontongkujaskalde mikkangchiba apsan daken a·selrang ong·e, manderang sina nangkuaigen ine Justice (Retd) BP Katakey mikrakataniko on·angaha.
