Kajinarangko gamjaengani a·sel GHADC-ko name chalaina man·jaenga: Dy CEM

TURA: Garo Hills Autonomous District Council (GHADC)-ni ning·o dingtang dingtang kamrangko ka·e cha·enggiparang, bading chiwalgiparang, skulko chalaienggiparang, bank-rang, dal·dalgipa company-rang aro dingtang dingtang kamrangko ka·enggipa manderang, an·tangtangni gamna nangenggipa tax ba kajinarangko gamtokjaengani a·sel GHADC-ko name chalaina man·jaenga ine Sombar salo, GHADC-ni Deputy Chief Executive Membor aro Taxation-ni Executive Membor In-charge Stevie M Marak parakatenba, GHADC-ni ning·o dingtang dingtang kamrangko ka·e cha·enggipa aro bading chiwalgipa pilakkon somoi gita kajinarangko gamchina didiataha.
Marak-ni talatani gitade, Garo Hills-o kam ka·e cha·enggiparang aro bading chiwalgiparang pilakan dingtang dingtang tax ba kajinarang, jekai Professional Tax, Trading for Non-Tribals (TNT) Tax aro uandakgipa kajinarangko gamna nanga indiba bang·bata manderangan an·tangtangni gamna nanggipa kajinarangko gamjaengani a·sel GHADC-ko name chalaina man·jaenga.
“Kajinako gamaniara an·tangtangni dakna nanggni kaman ine ma·sie na·simang GHADC-na kajinarangko gamgenchimode an·ching GHADC-ko nambate chalaina man·chongmotgen. Uni gimin an·tangtangni gamna nanggipa kajinarangko somoi gita gamchina anga GHADC-ni ning·o songdonggipa mande sakantikon mol·molatenga,” ine Marak parakataha.
GHADC-ni ning·o kajina gamkugijagiparangko bakan official-rang check ka·anggen ine janapatengon, je manderangan ba company-rangan kajinarangko gamkujachim, uandakgipa manderangna aro company-rangna GHADC, niamo pangchake sal 15 somoiko on·gen aro sal 15-ni gisepoba gamkujaode show cause notice-ko on·e ja·mano Executive Committee nanga gita ja·kurangko de·anggen ine Deputy CEM parakataha.
“Uni gimin an·tangtangni gamna nanggipa kajinarangko somoi gita gamenba, GHADC-ko ripinganio dakchakchina chinga A·chik a·songo songdongenggipa pilak ripengrangkon mol·molatenga,” ine Marak parakataha.
GHADC-ni ning·o A·chikrangni bimingo nokrangko ba dingtang dingtang kuturirangko ra·e gipin jatrangna bading chiwalna on·skaengani giminba Deputy CEM mikrakataniko on·angaha aro iani bidingo Benami Act-ko ra·gatna miksongani donga ine parakataha.