Election-ko jagnini gisepon ong·atchina dabia
TURA: Adita salrangna skang, Garo Hills Autonomous District Council (GHADC)-o Assam & Meghalaya Autonomous District (Constitution of District Councils) Rules 1951-ko gital Executive Committee (EC)-ni taridapanio adita chu·onggijanirang dongkuenga ine Indian National Congress (INC) parakatenba, GHADC election-o A·chik jatmangmangsan bak ra·pana man·na gita adita niamrangko taridapna nanga ine ku·pattianiko on·angaha.
Iani bidingo kobor ra·timgiparangna talataniko on·angengon, ADC Rules-ko gital EC-ni taridapanio, Rule 8-o sub-clause (d)-kosan on·dapaiaha indiba Rule 8-ni sub-clause (c) aro Rule 128-kode taridapjahani gimin ian Scheduled Tribe ine chanako man·gipa pilak jatrangnan GHADC election-rango bak ra·pana cholko on·ani gita ong·enga ine Congress dolna ku·wattimgipa Ferlin A Sangma parakatenba, GHADC election-o A·chikrangna agre gipin jatrang bak ra·pana man·jana gita niamrangko taridapchina GHADC-ni Executive Committee-na ku·pattianiko on·angaha.
“Gital Executive Committee-ni taridapgipa niamrangko chinga poraie nion, chu·onggijanirangko nikahani gimin mikkangchi A·chik jatna maming gimaani dongjana gita aro namgnirangko ra·bana man·na gita niamrangko taridapkuchina chinga didina sikenga. Chong·motan ADC Rules 1951-ni Rule 8(c) aro Rule 128-ko an·ching name poraienba taridapna nangchongmotenga. Rule 8(c)-ko taridapgija Rule 8(d)-mangmangko on·dapaianichide an·chingna niamrang chu·ongbrejaenga gita nika. Rule 128-kode man·a ong·ode den·gale galakoba anga an·tangde name nikenga maina ian 1950 bilsio Tribal ine channako man·e Meghalaya a·doko bilsi 12-na songdongmangimin manderangnade election-o bak ra·pana gita bilko on·gipa niamsa ong·a,” ine Sangma parakataha.
Rule 8(c)-o je Tribal-rangan pu·onna man·na uamangde susanaba man·aigen ingipa niam dongani gimin ian Tribal ine chanako man·gipa pilak jatrangna cholko on·na gita ong·enga ine janapatskaengon, GHADC election-o A·chikrangna agre gipin jatrangde bak ra·pana man·jana gita ia niamkoba taridapchina Congress dolni dilgipa didiataha.
Garo Hills-o da·o obostarang namangpilahani gimin aro GHADC-ni adita niamrangko taridapahani gimin GHADC election-ko jagnini gisepon ong·atchina gitaba Congress dolni dilgipa dabiangaha.
Garo Hills-o so·sojengjeng ong·ahani giminsa election-ko ra·doatna nangaha aro iako Congress dolba ra·chakaia ine janapatengon, GHADC-ni term-ko jadokna ra·dodapatanide orto gri ong·skaenga ine GHADC election-ko ta·raken ong·atchina Sangma dabiangaha.
